Everton lakah Arsenal an tlawm

Club tenau lakah han che ṭha ve deuh ṭhin mah se Arsenal an ropui thei lo. Mikel Arteta naute hi Thawhṭanni zan khan Everton lakah 2-1 in an chak lo; Premier League season kal laia vawi ruk an tlawmna a ni der tawh - champion an la hlat hle.

Goodison Park-a inkhelah Richarlison-a goal pahnih chu VAR hmanga hnawlsak a ni. Mahse, Richarlison hian Martin Odegaard-a goal khung a sut ta tho a, hun tawp hma chiahin Demarai Gray chuan goal ṭha bik hmangin a team a chakpui.

Phurrit a kiang
An hmelma Liverpool lakah 4-1 in an tlawm a, director of football Marcel Brands-a'n club a chhuahsan zui bawk. Club thuneitu lamin manager Rafael Benitez an thlawp thu sawi mah se an boruak a ṭha tawk lo tih a lang reng.

Everton hian a zawnin match kua zet chak ni hmel hmu lo chungin Arsenal an mikhual. Minute 11-naah Richarlison hmangin goal an khung ṭan, mahse ball a tauh hmain a offside tih video assistant referee hmanga nemngheh a ni.

Kum 1994 hnu lamah tun ṭum hi chak nei loa an kaltluan rei ber ṭum a ni a, minute 27-naah fans ṭhenkhat chuan khelmual an chhuahsan - stadium aṭanga an chhuah chhan erawh kum 27 chhung nomawi an chawi tawh loh vang a ni bawk; buaina a thuah hnih hle.

Goal an phur a, an goal khung pahnih an hnawlsak bawk. Everton tan khua a var mawlh lo, mahse hun tawp dawnah an phurrit a kiang. Richarlison-a'n Gray-a bar tih per let chu si phurh sut nan a tauh lut a, injury time-ah Gray chuan Ben White paltlangin goal ṭha tak a khung.

Gray hi nipui bazar lai khan pound maktaduai 1.7 leka an lakluh a ni a, tunlai sum hlutna leh player man zat chhut chuan a tlem takzet. Mahse, football hi sum hmanga teh vek theih a nih bik lohzia lantirtu a ni chiang hle.

Arsenal an zuih
A zawnin match riat chhung an tlawm lo a, tunah zet chuan an match hnuhnung paliah vawi thum an tlawm leh ta. Arsenal ṭantuten mawhpuh tur an zawng leh ta ruai mai, manager Mikel Arteta chu an kawh hmasak a ni leh ngei bawk.

Manchester United ngam lotu player aṭangin pali a siksawi a, hliam dam hlim Granit Xhaka leh Kieran Tierney an lo kir; Bukayo Saka leh Alexandre Lacazette te tlarhmaah awmin captain Pierre-Emerick Aubameyang chu bench lamah a awm thung.

October thla laihawla hliam tuar Tierney a dam chiang tawh a, tlarhnung lamah a ṭangkai tluk zetin a hma lam pawh a nawr ṭha bawk. Emile Smith Rowe tlanna ṭhina awm Saka erawh a langsar tawk lo, a nihna takah chuan goal an khung zeuh bak chu Everton tlarhnung an chhaih buai tam vak lo.

An goal hnihna khung turin Odegaard a vannei nawn lo a, striker Eddie Nketiah-a'n ban a tih ber bakah bench aṭanga lut Auba-a'n a hlah bawk. Minute 90 inkhel thlir chuan Gunners hi chak phu lo zawk an ni a, point an hmuh loh vanga vui thei an ni lo ang.

Arteta naute hian point 23 hmuin Premier League table-ah pasarihna an ni mek, khelh zat inangah palina West Ham an phak lohna chu point li a ni - an inhlat lutuk lo. Mahse, Hammers nen an inkarah Tottenham leh Man United an awm avangin a sang pali zinga tel phak a harsa dawn.