Covid-19 in Spurs a run

Tottenham Hotspur team zingah mi pariatin Covid-19 an kai tih hmuhchhuah a ni a, PCR hmangin test neih chhunzawm a ni dawn.

Spurs hi an player paruk bakah staff pahnih an positive nia hriat a ni a, Europa League an khelh turah nghawng lian tak a nei ang.

Antonio Conte hote hian December 9, Ningani zan hian Europa Conference League-ah Rennes an mikhual dawn a, group stage paltlang turin chak a la ngai.

UEFA danah chuan A list player 25 aṭanga 13 an tlin chuan inkhelh kalpui tur a ni a, an khel thei ta lo a nih pawhin group match hi December 31 hmaa khelh zawh vek tur a ni.

Spurs hi Premier League-a Burnley nena an inkhel tur chu vur tla vangin an sawn tawh bawk a, fixture a hautak chho dawn hle. Conte hote hian December 12, Pathianni zanah Brighton an hmachhawn dawn a, kaltlangpui a ni thei dawn em, tih chu hunin a hril ang.