Premier League Thlirlawkna (Thawh khatna)

March 13 aṭang khan Premier League chu Covid-19 vangin khelh chhunzawm theih a ni lo a, thla thum chhung an chawlh hnuah June 17, Nilaini zan aṭang hian an khel chhunzawm leh dawn.

Season dangah hrileng vanga chawlh hi a la awm ngai lo, kuminah erawh season chawlh leh season thar nghawng buai rak khawpin an chawlh a ngai. League an khelh leh tur hi a bul ṭan thar leh tur ang an nihna chen a awm a, chutih rualin a hmawr bawkna tur mai chauh a ni thung.

Premier League player leh manager zingah Mikel Arteta chu Covid-19 kai hriat chhuah hmasak ber a ni a, hri leng vang hian Manchester City an hmachhawn tur pawh ṭhulh a ni. League khelh chhunzawm leh hunah a khuh hawngtu an ni dawn - Nilaini zanah City an lenchilh ang.

Gunners hian season tir lamah buaina an ngah. Mesut Ozil leh Sead Kolasinac ten misual beih an tawk a, captain Granit Xhaka chu coach thutlukna a zawm loh avangin captain nihna hlihsak a ngai hial. Unai Emery an ban hnuah player a nih laia an captain hlui Arteta an lalut.

Spanish manager hian beiseina a siamsak mek, chutih rualin table-ah pakuana an nih avangin season thara European football khelh a harsa dawn. League khel chhunzawm leh tura an inbuatsaihna match pahnihah vawi khat an chak a, ṭum khat an tlawm thung. 

Hripui leng vang khan an hlawh 12.5%-in an ti hniam a, an chawlh lai khan David Luiz, Nicolas Pepe, Granit Xhaka leh Alexandre Lacazette te chu social distancing an zawm ṭhat loh vangin zilh an ngai.

An match hnuhnung paliah an tlawm vek avangin Aston Villa hi an dinhmun a ṭha lo, table-a 19-na dinhmun luah mektu niin hripui vanga chawlh lailawk ngai kha an tan chuan insiamṭhat theihna hun ṭha ni tura ngaih a ni.

Dean Smith-a naute tan inhamtang tur chuan hna a hautak dawn hle a, chutihrualin krismas laia inhliam an midfielder pawimawh John McGinn rawn kir thei tur hi an tan chanchin ṭha a tling.

McGinn bakah hian January thlaa an lakluh striker Mbwana Samatta chu eng ang taka hriam nge a ni tih a hriat theih tawh dawn a, season kal laia an player hmuhnawm leh ṭangkai Jack Grealish nen an pathuma an inkawp tur hian beiseina a siam.

Villa hian goal khung chu an harsat lutuk lo, table hniam lama awm team pali zingah chuan a khung hnem ber (34 goals) a ni a. Mahse, an tarhnung pawp hi an buaina lian ber a ni - goal 56 chhuah tawhin EPL season kal laia goal chhuah hnem ber an ni.

Team hmuhnawm zinga mi ni mah se Bournemouth hi tlahniam thei dinhmunah an ding mek a, an khelh hmabak thlirin season thara Premier League khel chhunzawm tur chuan chetsual loh a pawimawh dawn hle.

Match kua khelh tur an la neihah an chunga mi vek an hmachhawn dawn, a bik takin Wolves, Manchester City leh Manchester United khelmuala an lenluh thuah thih thain an khelh a ngai ang.

Covid-19 vanga an chawlh hma an match hnuhnung berah Liverpool 2-1 in an ngam lo, an goal khung tur pakhat James Milner-a'n goal line-ah a dansak hman avangin an ui hle, vanneih ṭum ni se hmahruaitu laka point hlawh chhuak thei tur khawpin an khel ṭha.

Kerek hliam vanga thla 12 deuh thaw an chhawr theih loh David Brooks a dam chiang tawh a, manager Eddie Howe-a'n a hmanthiam sa midfielder hian hmun pawimawh a chang chhunzawm ang. Player pawimawh Jefferson Lerma chu yellow card a hmu leh a nih chuan match hnih khel thei lo tura hrem a ngai dawn thung a, fimkhur a ngai dawn hle.

Kumin chhunga league match an khelhah chak ni hmel an la hmu lo a, coronavirus vangin chawl lailawk lo se la chu Brighton & Hove Albion hi EPL aṭangin an tla fel tawh pawh a ni zawk hial mai thei; hri leng vangin insiamṭhat theihna hun an neih phah.

An match hnuhnung berah Wolves nen goal awm loin an inhnehtawk a, manager Graham Potter chuan chak phu tak chunga point thum an hmu lo chu a ui hle. Potter chuan, "EPL match zawng zawng mai hi chu a nun rawng a ni, chutihrualin chona duhawm a ni tel si," a ti.

Tlarhnung ven ṭhat chu an hmasawn ngaihna a ni, an match hnuhnung 10 zinga pariatah goal an chhuah hmasa vek. Kuminah match ruk chu an khingpuite nen inhnehtawkin ṭum li an tlawm thung.

Inkharkhip lai khan an player zingah dan bawhchhia leh zilh ngai an awm lo a, season an chhunzawm leh turah hian hliam langsar pawh an nei lem lo. An match hmasa pathumah - Arsenal, Leicester City leh Manchester United an hmachhawn dawn avangin a hautak dawn.

Sean Dyche-a enkawl Burnley hian season thara European football khelh an tum, khel phak turin beisei an la nei bawk; 10-na ni mah se an chunga awm Arsenal an phak lohna chu point khat chauh a ni

League match sarih chhung chu tlawm nei loin an kaltluang mek, an hneh zingah Manchester United, Leicester leh Southampton te an tel. 

An match hnuhnung berah Tottenham nen an inhnehtawk bawk - hri leng vang hian an chhe thut lo turah ngai ang.

Player inhliam an nei lo a, tun thla tawp ruala an contract zo tur Aaron Lennon leh Joe Hart te chu tun season tawp thleng an kawl zui dawn tih a chiang tawh bawk. An ṭhat theih dan berin an inrem leh nghal thei dawn 

tihna a ni.

EPL bak chu inelna dang hmachhawn tur an nei tawh dawn lo, June 22 zana Manchester City an hmachhawn hunah point an hmu thei a nih chuan an match hmabak dang atan inrintawkna a 

siamsak ang.

Frank Lampard-a'n player thar lalut lo mah se season an hmang chhe hran lo, palina nilai an nih avangin season thara Champions League khelh leh khelh loh chu an kuta awm a ni.

Kum tir lam khan Manchester United an ngam loh hnuah Tottenham hnehin an tho chhuak leh nghal a, UCL-ah Bayern Munich ngam lo mah se FA Cup lamah Liverpool an pet chhuak ve leh thung, hriatthiam an har 

rih hle.

Inkharkhip lai khan Callum Hudson-Odoi leh Mason Mount ten chanchin lawmawm lo an nei, khelmualah erawh chhawr theih an ni ang. Contract pawtsei Olivier Giroud leh Tammy Abraham ten khelhna an inchuh dawn a, season tharah Timo Werner an neih belh dawn bawk.

Blues hian palina dinhmun an luah phak lo a nih pawhin inhnemna tur pakhat an la nei. An chunga awm Manchester City hremna chu kaltlangpui a nih chuan pangana ni chung pawhin UCL a khelh theih dawn.

Inkharkhip hma an match hnuhnung berah Watford chu Selhurst Park-ah Jordan Ayew-a goal hmangin an hneh a, bul ṭan thar lehna atana Bournemouth an lenchilh hunah pawh hnehna chan chhunzawm an tum ang.

Palace tan hian bulṭan fuh a pawimawh dawn, a hnu lamah Liverpool, Burnley, Leicester City leh Chelsea an hmachhawn a ngai dawn a, an hmabakah Manchester United an la awm bawk - a sang 10 zinga tel beiseina la nei mah se tihsual chuan hniam taka awm thei an la ni.

Roy Hodgson-a naute zingah inkhelh theih loh lai khan hrem emaw zilh emaw ngai an awm lo, tunah hian player hliam leh harsatna nei an awm lo bawk. League khelh chhunzawm hun hi an tan chuan duhthusam tih pawhin a sawi theih ang.

Team boruak ṭha viau mah se Palace hian harsatna an nei, goal an khung tlem. An match hnuhnung 15 aṭangin goal 12 chauh an khung, forward sawi hlawh Wilfried Zaha leh Christian Benteke ten an hna tlin taka an thawh a ngai.

Player tam tak tan chuan 'Carlo Ancelotti' tih chauh pawh hi thlamuanpui tham a ni a, Italian manager hian Everton a enkawl chinah nasa takin hma an sawn. An hmelma Liverpool hmachhawn chunga league khelh chhunzawm leh pawh hi an phur ang.

Champions League vawi thum champion tawh Ancelotti boruak lian viau mah se coronavirus vanga an chawlh hma khan an chesual nual. Newcastle United laka goal hnih an neih an hum zo lo a, Arsenal leh Chelsea an ngam lo bawk.

Tlarhma lama khel ṭha ṭhin tak Dominic Calvert-Lewin chu club lian dang awh tur khawpin a che chhunzawm thei dawn em tih fiah a ni dawn a, defender Mason Holgate pawh eng ang taka khauh nge a ni tih chu hripui len hnuah hian a hriat ang.

Chawlh lai khan Toffees manager bakah player ten ṭanpui ngai an ṭanpui nasa a, hrem leh thunun ngai an awm lo. June 21 zana Reds an hneh thei a nih chuan EPL boruak an chhem nung thar ang a, an chak lo a nih erawh chuan an hmelma hian nomawi an dawn theih dan a awm thung ang.

Khawvel barakhaiha Premier League nomawi chawi tawh Leicester City hi season hmang ṭha ber zinga mi an ni a, manager Brendan Rodgers kaihhruaina hnuaiah Southampton chu 9-0 a hnehin league match bika an chak chian ber record thar an siam hial.

Liverpool leh Manchester City te an elphak a, mahse nikum December thla khan Reds leh City hi an ngam loh avangin nomawi an beiseina erawh a tawp. Kuminah duhthu an sam lo, player pawimawh Wilfried Ndidi chu hliam vanga an chhawr theih loh bakah striker Jamie Vardy chu chhungkaw thil vangin a khel lo nual.

Nigeria international Ndidi-a'n training a zawm pangngai leh tawh a, Harvey Barnes, Ben Chilwell, Youri Tielemans leh Demarai Gray te an la awm bawk avangin pathumna dinhmun an luah lai chu humhim thei tura ngaih an ni.

Khelh hmabak an la neih zingah Arsenal, Tottenham leh Manchester United an la awm a, team khawng pangngai tak Sheffield United an hmachhawn a la ngaih dawn bawk avangin awlsam taka season khar mai theih erawh a ni dawn lo.

Coronavirus vanga buaina awm lo se chuan Liverpool kutah Premier League nomawi hlan a ni tawh ang a, tun ang hunah chuan season thar inbuatsaihna lam an hawi tawh ang - pre season bakah player lei leh hralh tur vangin club tin an buai mek hun ang kha a ni.

Jurgen Klopp-a nauten hneh loh nei loa league champion nih an tumna a thlawn a, hma taka champion lawm an tumna pawh hripui vangin tih khawtlai a ni bawk. Tunah erawh an duh leh beisei chu an sual chhuak ngei dawn ta niin a lang.

German manager chuan, "Naupang thaza ang maiin inkhelh kan chak tawh a, kan inpeih takzet," a ti. June 21-a an hmachhawn tur Everton tan ngaihthlak nuam a ni lo ang, champion tura match hnih chak bak mamawh tawh lo Reds fan-te chu champion lawmin an zai ṭan thei tawh ang.

Champions League leh FA Cup aṭangin an tla tawh a, an duh ber league atan an rilru zawng zawng an pe thei tawh. Mohamed Salah, Sadio Mane leh Roberto Firmino-ten goal an nawrho leh chu football ngainatute hmuh châk a ni.