Bagan an tlawm leh tawh - Jamshedpur an ngam lo
Mumbai City-in 5-1 ngawta an sawp hnuah pawh ATK Mohun Bagan an insiamṭha chuang lo a, Jamshedpur lakah 2-1 a an tlawm zui avangin sawiselna an tawk ṭan.
Jamshedpur tan Seiminlen Doungel leh Alex Lima ten goal khat ve ve an khung a, Men of Steel hian 2-0 in hma an hruai hman hial.
Mahse, Bagan tan Pritam Kotal chuan hun tawp dawnah goal khat a rawn khung ve leh a, a team chhanhim nan erawh a tling zo chuang lo.
Jamshedpur-in match li an khelhah tlawm la nei loin point riat an nei a, point kua neitu Mumbai City chu table-a an phak loh awmchhun an ni mek.
Men of Steel
Inkhel ṭantir aṭangin Jamshedpur chu team langsar zawk an ni a, Men of Steel hming lem an pek club hian Bagan goal-ah khung tumin an nawr nghal.
Jamshedpur hian goal khungna chance pawh an nei hma a, minute rukna lekah Nerijus Valskis leh Doungel ten ball lut chu tauh an tum dun a, an chance neih an khawhral phah.
Bagan tan season khata nuai 500 chuang hlawhtu Roy Krishna-a'n chance duhawm nei ve mah se a chhawr lo. Counter-attack-ah JFC an innghat zui a, mahse, Komal Thatal chuan a club hlui Bagan laka a chance neih chu a chhawr bik lo.
Kolkata club tan goalkeeper hlawh hnem Amrinder Singh a ding nghet laklawh a, Rangers forward hlui Greg Stewart chuan JFC tan chance nei ve leh mah se a dansak bawk.
Dan theih loh
Bagan-in ball chang tam mah se Jamshedpur an hlauhawm zawk a, minute 37-naah Seiminlen Doungel chuan Jitendra Singh-a siamsak chu goal hmahruai ni turin a khung - Amrinder-a'n a dang seng tawh bik lo.
Minute nga a liam a, Bagan an hlauhawm ve zui - Euro 2020 khelh zawh taka Finland tana inlan Joni Kauko chuan mawi zetin Krishna tan a siamsak.
Mahse, Fiji captain shot hi Jamshedpur keeper TP Rehenesh-a'n khawih thawi ringawt mah se Eli Sabia chuan goal line aṭangin a lo pet chhuak.
Vanneihnain Jamshedpur lam a ṭang emaw tih mai tur a ni a, Subhasish Bose-a cross ṭha tak Krishna-a'n a khawih hmaa Peter Hartley-a'n a lo petchhuah hmante chu a ṭha hle.
A tawpah JFC
Chawlhlawk hman hnuah Bagan an insiamṭha tih a lang a, mahse, a pawimawh ber goal an hlawh chhuak thei lo - hun tawp nan minute 10 chauh a awm tawh tiha substitute David Williams-a shot Rehenesh-a'n a lo dan hmante chu uiawm tak a ni.
Minute li a liam a, Jamshedpur bawk an vannei nawn. Alex Lima chuan mawi zetin an goal hnihna a khung a, Bagan-in goal an khung ve hmain JFC lamin 2-0 in hma an hruai der.
Hun tawp nan minute khat chiah a awm tawh tihah Pritam Kotal chuan Bagan beiseina siam turin goal khat a khung ve leh a, referee-in minute ruk pek belh mah se Kolkata club an tho tawh lo a, an tlawm.
JFC-in point thum hlawh mah se chanchin lawmawm lo erawh an nei a, goal hmahruai khungtu Seiminlen chu hliam vanga lakchhuah a ngai - he thu buatsaih a nih thleng hian a chawlh chen tur chiang taka sawi a la awm lo.
Mizo inlan
Jamshedpur tan Laldinliana Renthlei leh Ricky Lallawmawma ten inkhel bul an ṭan a, Mizo defender ṭha pahnih hian minute 90 an khel tluan.
English coach Owen Coyle-a'n Mizo player pahnih chungah rinna a nghat a, tun season-a match li an khelh tawhah player pahnih an la inlan kim vek a, Ricky-a'n assist vawi khat a nei tawh.
Zanin ISL inkhelah Hyde-rabad FC chuan Bengaluru an hmachhawn dawn a, Hyderabad-ah hian goalkeeper Lalbiakhlua Jongte leh midfielder Mark Zothanpuia chu Mizo player awm an ni.
Bengaluru-ah forward Edmund Lalrindika chu Mizo player awmchhun a ni a, Hyderabad leh Bengaluru hian point li ve ve an nei tawh.