Saints keeper thar Caballero

Southampton chuan Manchester City leh Chelsea goalkeeper hlui Willy Caballero chu thla khat chhung atan contract an ziahpui a, kum 40 mi keeper hi January 5 thleng an kawl ang.

Goalkeeper tawnhriat nei ṭha, City leh Chelsea a khelh laia bench lama a hun tam zawk hmangtu hian nipui transfer lai khan Blues a chhuahsan a, club dang a neih lawk loh avangin League One club AFC Wimbledon-ah training a nei mek.

Southampton hi an senior goalkeeper pahnih Fraser Forster leh Alex McCarthy an inhliam mek a, keeper pahnih inhliam avang hian hmanhmawh takin Caballero hi an lalut ta a ni.

Caballero-a'n City leh Chelsea tan hmun chang mumal loin hun hmang mah se a tawnhriat ringawt pawh hi Saints tan chuan a ṭangkai ang tih a chiang.