Group of death tak tak chu!

Champions League-ah club langsar apiangin ngaihven an hlawh a, hetihlai hian ngaihven loh lamah group G an ngaihnawm hle - club pali Lille, Red Bull Salzburg, Sevilla leh VfL Wolfsburg ten match khat chiah khelh tur awm tawh chungin last 16 luh an la beisei vek!

Zanin dar 1:30-ah Wolfsburg-in Lille an mikhual dawn a, German club Wolfsburg tan tlang tura chak a ngaih laiin Lille tan erawh draw result chauh pawh a tawk dawn thung.

Wolfsburg hi an league match hnuhnung pathumah an chak zo lo vek a, French champion Lille erawh an league match hnuhnung pathumah tlawm an nei lo - team pahnih boruak a inang lo ang tih a chiang.

German club tan forward Lukas Nmecha chu hliam vangin a inlan thei dawn lo a, season hmasaa goal 25 khungtu, tun season-a goal li chiah la khung Wout Weghorst tan mawhphurhna a sang ang.

Lehkha aṭanga en chuan Lille an ṭha zawk - French club hian Renato Sanches, Turkish striker Burak Yilmaz leh tun season-a match 23-a goal 13 khung tawh Jonathan David te an nei a, an khelh ṭhat ṭum chuan European club lian pawh hneh turin an ṭha tawk.

Group G inkhel dangah Red Bull Salzburg chuan zanin dar 1:30-ah Sevilla an mikhual dawn a, Salzburg tan draw result a tawk laiin Sevilla tan erawh chak ngei ngei a ngai thung.

Salzburg tan forward pawimawh Noah Okafor a inlan thei dawn lo a, Karim Adeyemi chu Austrian club ṭantuten beiseina nen an thlir ang - kum 19 mi striker hi tun season-a match 18 a khelh aṭanga goal 14 khung tawh a ni a, Sevilla tlarhnung tan ven bik a sual lo ang.

Austrian club tan defender pathum Bernardo, Bryan Okoh leh Maximilian Wober bakah midfielder Zlatko Junuzovic chu hliam vangin an inlan dawn lo a, an ṭhat dan berin Sevilla an mikhual thei dawn lo.

La Liga-a pahnihna ni mek Sevilla hi dinhmun chhe zawk ni mah se player nei ṭha zawk an ni a, an mamawh point thum hlawh chhuak turin an ṭha tawk.

Hetihrual hian Sevilla hi Erik Lamela, Suso, Jesus Navas leh Youssef En-Nesyri te hliam vangin an inlan theih a rinawm bik lo a, an ṭhat dan bera inkhel tur an ni bik lo.

Chutihrual chuan Spanish club hi tawnhriat nei ṭha Ivan Rakitic, rawlthar duhawm Rafa Mir leh Argentine winger Lucas Ocampos te nen an la inlan thei dawn tho a, fan-ten beiseina an tisang a nih pawhin a awm lo hran lo ang.