Leverkusen an chelh, Gladbach tan hun ṭha

Bundesliga-ah Champions League khel tur inchuh boruak a sang chho zel. Pathianni zanah Bayer Leverkusen leh Schalke te 1-1 a an inhnehtawk avangin Borussia Monchengladbach tan lehpelh lehnghalna hun remchang a inhawng. Zanin dar 10 hian Gladbach-in Wolfsburg an mikhual ang.

Veltins Arena-ah Schalke-in Bayer Leverkusen an mikhual a, David Wagner-a hote hian January 17-a Borussia Monchengladbach an hneh hnuah chak an la nei lo. Leverkusen erawh DFB Pokal final lut turin FC Saarbrucken 3-0 in an hneh a, an player pawimawh Kai Havertz-a’n bul a ṭan thei ta bawk.

Schalke tan Ahmed Kutucu-a’n vawi 21 bench aṭanga a luh hnuah a vawi khat nan bul ṭantir a ni a, Turkish forward hian inkhelh ṭantir lamah goal a khung teuh hle. Second half-ah Schalke an vannei a, VAR hmanga en nawn hnuah ball-in Leverkusen defender Edmond Tapsoba kut a per avangin penalty an hmu. Minute 51-naah Daniel Caligiuri-a’n Schalke hmahruaina goal a khung.

Leverkusen goal bawh a nat zui avangin season thara Bayern zawm tur Alexander Nubel-a’n hna a ngah a, Schalke keeper  hian Nadiem Amiri leh Kevin Volland te goal khung tur a dansak. Minute 81-naah Amiri cross chu Schalke defender Juan Miranda-a’n an lamah a tlawh lut a, 1-1 in an inhnehtawk. 

Schalke-in match 13 chhung chak hmel an hmu tawh lo a, Champions League khelh tum Leverkusen-in point hnih an hloh tiin a sawi theih bawk.

Bundesliga-ah point inzat hmu an awm a nih chuan goal difference en tur a ni a, Leverkusen-in point khat an hmuh avangin Borussia Monchengladbach chungah awmin palina dinhmun an luah. 

Gladbach tan season thara Champions League khel turin chak ngei a ṭul a, zanina Wolfsburg nen an inkhelh hunah goal 10 leh assist 10 nei tawh  Alassane Plea an chhawr leh tawh dawn. Amaherawhchu kartawpa Bayern Munich an hneh loh 

ṭuma inhliam Marcus Thuram dinhmun a chiang lo. French forward Thuram pawh hian goal 10 leh assist vawi riat a nei tawh a, a inlan theih chuan Gladbach tan chanchinṭha a ni ang.

Borussia Park-ah Gladbach leh Wolfsburg te an inkhelh ṭumin goal awm loa inhnehtawk a la awm lo a, chuvangin zaninah pawh goal a luh ngei a beisei theih. Club pahnih inkarah Wolves record a ṭha zawk a, vawi 27 an nhmachhawn tawhah vawi 15 an chak a, Foals (Gladbach sawina) hi vawi ruk chauh an chak avangin Champions League khelh tum Gladbach tan point thum hmuhna awlsam a ni dawn lo.