Mizoramin Bihar an hneh!
Board of Control for Cricket in India (BCCI) hnuaia state hrang hrang inelna Vijay Hazare Trophy (2021-22) khelh laiah, nimin khan Mizoram chuan team ṭha Bihar chu wicket sarihin an hneh.
Mizoram tan Uday Kaul-a'n 121 runs siamin a ding tlang a, tualchhung player Joseph Lalthankhuma chuan hun pawimawh laiah nghet takin a dinpui. Ramhlun Venglai tlangval hian run 43 siamin a dam tluan ve bawk.
Mizoram hian vawiinah an match hnihna an khel leh nghal dawn, a hmun ngai Sawai Mansingh Stadium, Jaipur-ah chawhma dar 9:00 aṭangin Sikkim nen an inhmachhawn ang. Inkhel hi Hot Star-ah live a en theih a ni.
Plate group-ah Mizoram hian match nga an khel dawn, Bihar leh Sikkim bakah Arunachal Pradesh, Meghalaya leh Nagaland te an la hmachhawn leh dawn. A sang ber chauhin knock out stage an lut ang.
Inkhel chu
Sawai Mansingh Stadium, Jaipur-a inkhelah Mizoram hi ṭhumvawrah an vannei zawk a, vawm hmasak an thlang. Ramhlun Venglai tlangval Remruatdika Ralte chuan over 10 a vawm aṭangin wicket nga a la a, 60 runs pe mah se a hna thawh hi sawi nep theih a ni lo.
Bihar tan S Gani-a'n ball 139 a hmachhawn aṭangin run 114 a vaw chhuak a, run 43 siamtu Rathour leh Ashutosh Aman (19 runs) ten an thlawp ṭha pangngai viau bawk. Mahse, Mizoram lamin over 47.4-ah an target khumin hnehna an chang.
Tualchhung player an khel ṭha a, Joseph-a bakah hian a tira lut Amatea chuan run 29 a siam ve bawk. Indian Premier League thlenga tawnhriat nei tawh Kaul-a uapna hnuaiah thlamuang takin an khel tia sawi theih a ni.
An lawm
Mizoram manager Zosanglaina chuan, "Bihar hi kan vawi khat hnehna a ni a, team ṭha an nih avangin anni hneh theih chu a lawmawm takzet. Ka nauten an khel ṭha em em a, vawiina match kan khelh leh turah pawh beiseina sang tak kan nei dawn.
"Kan khelhna hmunah hian dai (dew) a tam a, hei vang hian a vawm hmasa tan kawng a inhawng zau deuha ngaih a ni. Sikkim nen kan inkhelh turah pawh ṭhumvawra vannei zawk nih a pawimawh dawn," tiin Vanglaini a hrilh.
Cricket Association of Mizoram (CAM) honarary secretary Mamon Majumdar chuan, "Bihar laka kan hnehna chan hian tualchhung player-te hmasawnna chu a tak a ni tih a lantir," tiin a sawi ve bawk. BCCI president Sourav Ganguly chuan CAM team hi lawmpuina a rawn hlan a ni.
Mizoram Fixtures
December 8, Nilaini
A hmun: Sawai Mansingh Stadium, Jaipur
Mizoram (223/3) bt Bihar (222/8)
Mizoram wicket sarihin an chak
December 9, Ningani
Sikkim 09:00 AM Mizoram
December 11, Inrinni
Arunachal Pradesh 09:00 AM Mizoram
December 12, Pathianni
Meghalaya 09:00 AM Mizoram
December 14, Thawhlehni
Nagaland 09:00 AM Mizoram
Mizoram Cricket Team
# Player Khua/Veng
1 Lalhmangaiha Dawrpui
2 Lalhruaizela Durtlang
3 K. Lalremruata Upper Republic
4 Lalhruaimawia Ralte Bawngkawn
5 Bobby Zothansanga Chaltlang
6 G. Lalbiakvela Luangmual
7 Andrew Vanlalhruaia Armed Veng
8 Vikash Kumar Electric Veng
9 B. Lalnunfela Hunthar
10 Joseph Lalthankhuma Ramhlun Venglai
11 Remruatdika Ralte Ramhlun Venglai
12 Zothanzuala Durtlang
13 C. Lalrinsanga Zotlang
14 K. Vanlalruata Durtlang
15 H. Zothanchhunga Durtlang
16 Moses Ramhlunmawia Hunthar
17 Parvez Ahmed Zotlang
18 Taruwar Kohli Jalandhar
19 Uday Kaul Chandigarh
20 Iqbal Abdullah Mumbai