Inter ngamtu Real an sang

Real Madrid chuan Champions League group stage-a an match hnuhnung berah 2-0 in Inter Milan an hneh. Los Blancos tan Toni Kroos leh Marco Asensio-ten goal an khung a, group D-a hmahruaitu ni chungin last 16 an lut.

Inter-in Santiago Bernabeu-ah hnehna an chan chuan group hmahruaitu an ni thei dawn tih an inhria a, last 16 lut chiang tawh mah se group hmahruaitu nih hi knockout round-a team ṭha pumpelh theihna a ni a, chak an tum.

Mahse, Italian club vanneih zan a ni lo - Lautaro Martinez chuan hnai set sawt aṭangin a volley goal thei lo a, Edin Dzeko chuan a hun ṭha neihah Thibaut Courtois-a zawnah tak ball a tauh a, Ivan Perisic-a'n post a tih per bawk.

German midfielder ṭha mi Kroos-a goal khung hi Real-in European Cup-a goal 1,000 an khung tlinna chiah a ni a, European football-a club inelna sang berah heti zat goal khung thei dang an awm lo.

Real tana Asensio goal khung chu goal mawi bik a ni a, bench aṭanga luhtir Spanish attacking midfielder hian box pawnah ball a lak hnuin mawi zetin goal chung kil sirah a thlawh lut.

Group D inkhel dangah Shakhtar Donetsk leh Sheriff Tiraspol chu 1-1 in an inhnehtawk a, mualneitu Ukrainian club tan Fernando chuan minute 42-naah goal hmahruai khung mah se Sheriff hian hun pek belhah Boban Nikolov hmangin an chhanglet.

Moldovan club Sheriff hi chak lo pawh ni se group D-ah pathumna an ni chiang tawh sa a, Europa League preliminary knockout round an khel zui ang.