Rangnick-a'n sports psychologist a sawifiah

Manchester United manager lailawk Ralf Rangnick chuan coaching staff-a tel turin New York Red Bulls leh FC Toronto manager hlui Chris Armas a lalut a, sawizui hlawh erawh sports psychologist Sascha Lense a lak tel chungchang a ni.

Kum 63 mi Rangnick chuan, "Ka thlirna aṭang chuan a dik thlap. Nuamsa taka ṭhu a, player-te thlira hlawh la tur a ni lo. Goalkeeping, physical education, strikers leh fitness puala coach bik kan nei a nih chuan thluak tan eng nge coach bik kan neih loh ang. Germany-ah chuan tun hnai khan club ṭhahnem takin sports psychologist an chhawr a ni," tiin thluak sawizawitu tur sports psychologist an lak chungchang a sawi.

Rangnick chuan sawi chhunzawmin, "German national team-a sports psychologist hna thawk mek Hans-Dieter Hermann hi kum 1998 khan Ulm-ah ka lalut tawh. Germany club zinga sports psychologist ruai hmasa ber kan ni hial ang.

"Player-ten an thluakin a taksa hnathawh a pui dan tur an hriat a ṭul a, taksa pui lo zawngin thluak hi a thawk theih vang a ni. Football kan sawi apiang hian kan sawi tam zawk hi thluakah a lut a, kan ngaihdan leh thil thlen dan zirchian nan a ṭul a ni," tiin sports psychologist ṭangkaina a sawi.

German manager Rangnick hnuaiah Manchester United-in khelh dan phung nghet neih an tum a, an match hmasa bera Crystal Palace an hneh ṭum pawhin player-ten ṭum dang aiin pressure an pe ṭha. Nizan khan Young Boys nen Champions League match hnuhnung ber an khel a, Rangnick hian starting eleven siksawiin player zir chian nan a hmang.