Liverpool tan a awl mah mah; Atletico an tling

Champions League group of death-ah Liverpool an chak fai vek! Ni e, i chhiar dik e - Liverpool chuan Thawhlehni zan khan khualmualah AC Milan chu 2-1 in an hneh a, group stage match ruk an khelhah an chak fai vek!

Round of 16 lut tura chak mamawh Milan tan Fikayo Tomori chuan goal hmahruai khung mah se Reds-in Mohamed Salah leh Divock Origi hmangin an chhanglet a, hun a tawp meuh chuan 2-1 in Liverpool an chak.

Milan-in Champions League an mangṭha a, Atletico Madrid tan erawh an duh ang vekin engkim a thleng. Spanish club hian last 16 lut turin an chak bakah Milan tlawm an mamawh a, an mamawh an hmu.

Porto khelmualah Atletico tan Antoine Griezmann, Angel Correa leh Rodrigo de Paul ten goal khat ṭheuh an khung a, Porto tan hun pek belha Sergio Oliveira-a penalty goal-in danglamna a thlen phak lo.

Milan beiseina
San Siro-a inkhelah Milan-in European football-a an ropuina ṭhin neih let tumin theihtawp an chhuah a, Liverpool erawh last 16 lut chiang tawh an nih avangin coach Jurgen Klopp-a'n player pariat ngawt a rawn thlak thung.

Minute 28-na a ni a, Milan corner aṭanga ball kal chu Takumi Minamino-a'n goal post bul aṭangin a pet chhuah ṭhelh a, goalkeeper Alisson-a'n dan per bak a ti thei lo - a per lehlam hi Tomori chuan goal-ah a lo chantir a, San Siro thawm a ṭha ham ham hle.

Mahse, Milan tan Liverpool hneh tum chu a u hret a, Reds hian minute 36-na lekah an si phurh an sut lehnghal - goal khungtu chu tu dang ni loin Salah a ni a, Egyptian forward hian Alex Oxlade-Chamberlain-a 'shot' keeper Mike Maignan-a'n a dan per chu goal-ah a chantir.

Liverpool-in last 16 lut tawh mah se chak loh an duh lo - minute 55-naah Mane shot per lehlam chu Origi-a'n goal-ah a lo chantir ve leh a, Belgian striker hian tun season-a match 10 a khelh tawhah goal nga a khung tling ta.

A hming Salah
Milan-in Liverpool an hmachhawn hmaa Atletico an hneh avangin beiseina sang tak nen Reds mikhual mah se an tan Liverpool an la sang hret a, an ṭhat dan berin khel chhuak lo mah se a tawpa hming langsar ber pawh Salah bawk a ni.

Salah hian tun season-ah match 21 lek aṭangin goal 20 a khung tling ta der a, assist vawi kua a nei bawk - Ian Rush (1981-1987) hnua Liverpool player zinga season nga chhung a zawna season tin goal 20 khung tling ziah thei awmchhun a ni ta.

Kum 29 mi forward hian Anfield-ah kum 2023 thleng cham turin contract a nei mek a, Liverpool nen contract thar ziak turin an indawr rei ta hle - he thu buatsaih thleng hian an la inrem lo.

Liverpool-in point 18 ngawt hmu chungin last 16 an lut a, English club zinga Champions League group stage match ruka chak vek thei awmchhun record an siam - a nep lo hle.

A tawpah Atletico
Atletico Champions League zinkawng chu movie hmuhnawm tak ang mai a ni a, a tawpah a changtupa an che. Liverpool-in inkhel lehlamah Milan an lo hnehsak a, Atletico hian an tih tur tiin Porto an hneh ve zui bawk.

Minute 13-na lekah Luis Suarez chu hliam vangin lakchhuah a ngai a, a tirah chuan Atletico hi an vanduai dawn niin a lang hman - mahse, minute 56-naah Griezmann chuan goal hmahruai a khung a, Spanish champion-in beiseina an nei.

An hlim chhung erawh a rei lo - inkhel boruak a 'hot' a, buaina a chhuak. Atletico-in goal an khung aṭanga minute11 hnu lawkah Yannick Carrasco-a'n hun khawhral tumin ball a keng a, ben thlak saktu Otávio chu kut a thlak a, red card a hmu.

Mahse, Porto hian an tam an chhawr hman lo - Wendell-a'n a ball ken lai lasak tumu Matheus Cunha chu a kiuin a nghawk niin a lang a, referee-in Wendell a hnawk chhuak ve zui a, buaina tenau a chhuak zui!

Chak phu zawk
Player tam zawk nih an chhawr theih hunah Porto-in insum nachang an hre lo a, substitute goalkeeper Agustin Marchesin pawh khelmuala lut lo chungin hnawhchhuah a ni.

Hun tawp a hnai a, Atletico bawkin goal an khung nawn - Angel Correa chuan minute 90-naah chak nemnghehna goal a khung a, De Paul chuan minute hnih hnu lawkah a rawn khung ve leh bawk.

Porto tan Oliveira chuan hun pek belhah vek penalty hmangin si phurh rawn sut ṭhen mah se a team a fuih phur zo lo a, hun a tawp meuh chuan 3-1 in Atletico Madrid an chak.

Tla thei dinhmuna ding Atletico tan Champions League season hnuhnung pariata last 16 an luh vawi sarihna a ni a, La Liga lamah Pathianni zana Madrid derby khel turin Real Madrid-in an nghak mek bawk.