December 26 aṭangin I League

Hero I-League 2021-22 season chu December 26, Pathianni tlai dar 2:00-ah khelh ṭan a ni dawn a, match hmasa berah Trau leh Indian Arrows te an inkhel ang. Covid-19 vangin inelna hi Kolkata-ah khelh vek a ni dawn.

Stadium pathum Mohun Bagan Ground, Kalyani Stadium leh Naihati Stadium-ah te khelh a ni dawn a, player bakah coaching staff leh referee-te chu Covid-19 laka an him theih nan khuahkhirh an ni dawn a, inkhelhna hmun leh hotel bakah an kal a remchang dawn lo a ni.

Tun season-ah hian team 13 an tel dawn a, chungte chu Mizo club Aizawl FC, Churchill Brothers, Gokulam Kerala, Indian Arrows, Kenkre FC, Mohammedan, Neroca, Punjab, Rajasthan United, Real Kashmir, Sreenidi Deccan, Sudeva Delhi leh Trau te an ni dawn.

Rajasthan United leh Kenkre FC te chu Hero I League Qualifiers 2021 aṭangin an inpettling a, Sreenidi Deccan FC erawh inlei tling an ni thung. Inelnaah hian team 13 te hi vawi khat ṭheuh an inkhel chhuak a, chumi zawh chuan a sang pasarih chu group A-ah awmin champion tur an zawng ang. Group B-ah a hnuai lam team paruk an awm ang a, relegate tur an zawng ve thung ang.

Aizawl FC-in an match hmasa berah Real Kashmir an hmachhawn dawn a, team 13 an awm avangin round tinah team pakhat zel an awl. Mizo club an vanduai a, round tawp berah an awl avangin round laklawhah hahchawlhna hun an nei ve dawn lo.

Aizawl FC Fixtures
Date Time Opponent
December 27, Thawhṭanni 4:30 PM Real Kashmir
December 30, Ningani 7:30 PM Mohammedan
January 4, Nilaini 2:00 PM Rajasthan United
January 9, Pathianni 4:30 PM Punjab Football Club
January 14, Zirtawpni 2:00 PM Sudeva Delhi FC
January 19, Nilaini 2:00 PM Indian Arrows
January 24, Thawhṭanni 7:30 PM Churchill Brothers
January 29, Inrinni 4:30 PM Kenkre FC
February 3, Ningani 4:30 PM Gokulam Kerala
February 8, Thawhlehni 7:30 PM Trau
February 13, Pathianni 2:00 PM Neroca
February 18, Zirtawpni 2:00 PM Sreenidi Deccan