AFCON khelhna hmun sawn dawn lo

Africa khawmualpuia football thuneitu sang ber Confederation of African Football (CAF) chuan, Africa Cup of Nations (AFCON) khelhna hmun sawn tur anga sawina awm chu an pha.

Tun hnaiah Covid-19 hri thar Omicron variant hmuhchhuah a ni a, Africa khawmualpui hi a tuar langsar zual an ni a, United Kingdom sorkar chuan a 'red list' zingah Africa ram South Africa, Namibia, Zimbabwe, Botswana, Lesotho, Eswatini, Angola, Mozambique, Malawi leh Zambia te a telh hial.

Hetianga zin pawh theih loh tura ram ṭhenkhatin Africa ram tam tak an dah takah chuan AFCON khelhna tur hmun Cameroon pawh sawn mai tur anga sawi a awm a, Qatar hming thlengin sawi rik a ni.

Mahse, CAF director of commu-nications Alex Siewe chuan, "Thu lengvak mai mai ngaihtuah turin hun kan nei lo a, inhmuhkhawm hnuhnung berah chuan AFCON khelhna tur hun emaw, a hmun emaw thlak chungchang engmah sawi a awm lo.

"Theihtawp chhuahin hna kan thawk mek a ni," tiin a sawi a, ruahman ang chuan January 9-ah inelna hi neih ṭan a ni ang a, February 6-ah khar tur a ni ang.

Siewe chuan, "CAF hruaitute pawh inelna tur hmun pan turin zalenna pek an ni tawh a, general secretary Veron Mosengo-Omba pawhin ni hnih hnu lawkah min rawn zawm ang," tiin inbuatsaihna an kalpui reng thu a sawi.

AFCON hi hri leng vangin an sawn ngun ve tawh hle. A tirah chuan June - July, 2021 khan khelh tura tih a ni a, mahse, January 15, 2020 khan CAF chuan hetih huna sik leh sa boruak vangin January 9 - February 6, 2021 inkara khelh tura inelna an sawn thu an puang.

Mahse, June 30, 2020 khan CAF chuan Covid-19 vangin inelna chu January 2022-a sawn a nih thu an puang leh a, a hmingah erawh 2021 Africa Cup of Nations tih a la ni reng ang.

Tun hnaiah khan European Club Association (ECA) chuan Africa khawmualpuia Covid-19 hri len dan ngaihtuahin, player-te himna ngaihtuah chunga AFCON chu ngaihtuah ṭhat ṭul an tih thu an sawi a, football khawvela thuneitu sang ber FIFA nen inbiak an duh.