Foxes leh Napoli dinhmun chingfel dawn

Europa League aṭangin Leicester City leh Napoli te chu knock out stage lut phak lo thei dinhmunah an ding mek, zanin dar 11:15 hian an dinhmun tur chinfel a ni ang - Naples khawpuiah Foxes an lenglut dawn.

Group C-ah Leicester hian hma an hruai mek, mahse an la tla thei tho! Tlang tur chuan point khat tal an hmuh belh a la ngai, chak loh a thiang lo. Napoli erawhin tlang tur chuan chak ngei an mamawh thung.

Inkhel dangah pahnihna ni lai Spartak Moscow leh Leiga Warsaw te an inhmachhawn dawn bawk, anni pahnih pawh hi tlang thei an la ni. A chak zawk zawk an tlang dawn, an inhnehtawk a nih chuan an tla ve ve thei.

Intawn tawhna
Leicester City leh Napoli hi tun hmai vawi khat chiah an la inkhel. September thla khan King Power Stadium-ah intawngin English club hian 2-0 in hma an hruai fal a, a tawpah erawh 2-2 in an inhnehtawk.

Italian club tan Victor Oshimen-a'n goal hnih khungin point khat hlu tak an sual chhuak a nih kha, an intawn hmasaka goal hnih khungtu Osimhen hi tunah chuan hliam vangin a chawl mek, channa lian tak a ni ang.

Luciano Spalletti enkawl Napoli hi Serie A lamah Atalanta laka tlawm hlim an ni bawk a, insiamṭhat an mamawh hle. Leicester pawhin Premier League-ah result ṭha an nei bik lo; Aston Villa laka tlawm hlim an nih avangin chhuan tur an nei bik lo a ni.

Hmalam en a ngai
Napoli hi a tirah kha chuan rinkai an ni, mahse beisei angin result an nei ṭha lo hle. Player pawimawh pahnih striker Victor Osimhen leh centre-back Kalidou Koulibaly te tel loin Leicester an mikhual a ngai dawn, forward Mertens chungah mawhphurhna a sang ang.

Tun hnai a match hnuhnung pali aṭanga goal nga khungtu Mertens chuan, "Kan kal san tawh thil chu kan theihnghilh a ngai, tunah chuan kan hmabak chauh kan ngaihtuah a ngai tawh zawkin ka hria.

"Player hliam kan nei ngei a, chhuanlama hman erawh a rem dawn lo. An tel loin engtin nge kan khelh theih ang tih kan ngaihtuah a ngai zawk, squad-ah theihna nei sang tak tak an awm avangin kan tum ram kan thlen theih ka beisei," a ti.

Saihuai ser hun
Brendan Rodgers-a'n an match hmasa lamah player naupang a chhawr ṭhin. Premier League lama a chhawr rim loh deuh ten hmun an chang ṭhin, tun ṭumah chuan an ṭhat theih dan bera a naute a rem a ngai tawh dawn.

James Maddison leh Wilfred Ndidi bakah Patson Daka te hi Europa League lama an chhawr rim leh che ṭha ṭhinte an ni a, zaninah pawh an lakah mawhphurhna a sang dawn - a hmatawngah Jamie Vardy a inlan a rinawm bawk.

Kum 48 mi Rodgers chuan, "A tawp thlengin kan bei tur a ni, inelna zawh hma chuan beidawn a thiang lo," tiin an match hmasa zawk an khelh zawh hnuin a sawi, a thu sawi ti dik tur chuan zaninah thapui an thawh a ngai ang.