Hamilton-a'n a elpui Verstappen a sawisel

Inelna boruak a sang tawh a, intlansiak hmabak pakhat chauh a awm tawh bawk. Tlankawng pawn lamah ṭawngkam hmanga inbeih chhunzawm a ngai ta. Lewis Hamilton chuan a elpui Max Verstappen chet dan pawh a sawisel.

Hamilton leh Verstappen te hian season kal laiah boruak neuh neuh an nei zing ta hle, intlansiakna chhungah ngei pawh a takin an inbei miah miah zel. Inelna hnuhnung ber Saudi Arabian Grand Prix-ah pawh a takin kan hmu.

Mercedes driver Hamilton chuan, "Midang ti palh lo leh a ṭha thei ang bera tlan hram hram kha ka tum, mahse a theih ngang loh chin a awm. Intlansiak huangah hian kum 28 zet hun ka hmang tawh.

"Elpui hautak tak tak leh harsa pawh ka hmachawn hnem tawh, tun ṭuma mi zet hi chu a buaithlak a ni. Dan leh hraiin awmzia a nei lo a, driver ṭha tak ni mah se pawisak a nei lo ni berin ka hria," tiin a elpui Max chungchang a sawi.

Hamilton leh Verstappen te hian point 369.5 ve ve an nei mek. December 12, Pathianni zanah a hnuhnung ber atan Abu Dhabi GP an tlan leh ang, hetah hian champion tur chinfel a ni dawn.