Goal khung thei bik Haaland leh Haller

Thawhlehni zan Champions League inkhelah goal khung thiam bik pahnih Erling Braut Haaland leh Sebastien Haller ten an club tan goal an khung ve ve a, an dinhmun erawh match hnuhnung ber khelh hmain chinfel a ni tawh.

Group C hmahruaitu Ajax chuan Sporting Lisbon 4-2 in an hneh. Dutch club tan hian Haller-a'n penalty aṭangin goal hmahruai a khung a, a hnuah Antony, David Neres leh Steven Berghuis ten goal an khung ve leh bawk.

Erik ten Hag-a enkawl Ajax hian group match vawi ruk an khelhah hnehna an chang vek, striker Haller-a'n an match zawng zawngah hian goal a khung vek; Cristiano Ronaldo (2017-18) nen an pahnih hian UCL group match zawng zawnga goal khung vek thei awmchhun an ni.

Inkhel dangah Borussia Dortmund chuan Besiktas 5-0 in an sawp. German club hian point kua hmuin pahnihna Sporting nen an point a inzat, mahse club pahnih intawna record nei chhe zawk an nih avangin UCL aṭangin an tla.

Dortmund tan Haaland leh Marco Reus ten goal hnih ve ve an khung a, forward Donyell Malen-a'n goal a khung bawk. Bayern Munich an ngam loh hnua an match khelh leh hmasak berah an khel ṭha hle - awmzia erawh a nei phak tawh lo.

UCL aṭanga an tlak avangin Europa League an khel chhunzawm dawn a, nakkum January thlaah Europa League last 32 (playoff) an khel ang. Europa League aṭang hian group hmahruaitu an tlang nghal a, pahnihna te nen playoff hi an khel dawn a ni.