ISL-ah goal a lut hnem
Thawhlehni zan Indian Super League-ah goal sarih ngawt a lut a, FC Goa chuan 4-3 in East Bengal an hneh - Goan club tan tun season-a an vawi khat chakna a ni a, Kolkata club erawh chak la nei loin table mawngphah luahtu an ni!
Goa tan Alberto Noguera chuan minute 14-na lekah goal hmahruai a khung a, East Bengal tan Croatia tana vawi hnih lo inlan tawh Antonio Perosevic chuan minute 26-naah a chhanglet.
Team pahnihin goal an inkhung chhawk zak zak a ni ber - Goa tan Jorge Ortiz chuan minute 32-naah penalty hmangin a khung ve leh a, minute nga awrh a liam tihin Amir Dervisevic chuan East Bengal tan a chhanglet ve leh zui!
Minute 40 pawh a nih hmain goal li a lut der tihna a ni a, Goan club-in an la duhtawk lo cheu - East Bengal goal hmasa ber khungtu Perosevic chuan minute 44-naah an lamah a ti lut a, Goa-in 3-2 a hmahruaiin first half a tawp.
Chawlhlawk hman a nih hnuah Kolkata club tan Perosevic bawk a inlar leh a, season hmasaa Hungarian club Újpest tana khel striker hian a tihsual thup nan si phurh a rawn sut nawn; 3-3 a ni a, team pahnih an inhnehtawk mai rinna a lian hman.
Mahse, Goan club an bei-dawng lo - goal hmasa ber khungtu Noguera chuan minute 79-naah a rawn khung ve leh a, goal dang lut loin 4-3 in FC Goa an chak.
East Bengal tan Lalrinliana Hnamte chuan inkhel bul ṭan lo mah se minute 60-naah luhtir a ni a, Mizoram Premier League club Chanmari midfielder hlui hian a team erawh a chakpui zo ta bik lo.
Zanin ISL-ah inkhel pakhat a awm dawn a, league hmahruaitu Mumbai City chuan zan dar 7:30-ah an hnuai chiaha awm Jamshedpur an hmachhawn ang - team pahnih daidantu hi point khat lek tih theihnghilh loh a ṭha.
Mumbai hian ISL player man to ber Lalengmawia (Apuia) leh Hmingthanmawia (Valpuia) te an kawl a, Vaivakawn tlangval Apuia hi Mumbai tan player pawimawh a nih avangin zaninah pawh bul ṭan tura beisei a ni.
Jamshedpur tan Laldinliana Renthlei leh Ricky Lallawmawma chu player pawimah an ni a, defender pahnih hian zaninah pawh bul an ṭan a rinawm - defender PC Laldinpuia pawh an kawl.
Inkhel Result
SC East Bengal 3 - 4 FC Goa'
SCE: Antonio Perosevic 26', 59'; Amir Dervisevic 37'
FCG: Alberto Noguera 14', 79'; Jorge Ortiz 32' (P); Antonio Perosevic 44' (OG)
Zanin Inkhel Tur
Mumbai City FC 7:30 PM Jamshedpur FC
Team Dinhmun
# Team Pld W D L GF GA GD Pts
1 Mumbai City 4 3 0 1 12 5 7 9
2 Jamshedpur 4 2 2 0 7 4 3 8
3 Chennaiyin 3 2 1 0 3 1 2 7
4 Odisha 3 2 0 1 10 7 3 6
5 ATK Mohun Bagan 4 2 0 2 9 9 0 6
6 Kerala Blasters 4 1 2 1 5 6 -1 5
7 Hyderabad 3 1 1 1 4 3 1 4
8 Bengaluru 4 1 1 2 7 9 -2 4
9 NorthEast United 4 1 1 2 5 7 -2 4
10 Goa 4 1 0 3 6 11 -5 3
11 East Bengal 5 0 2 3 8 14 -6 2