Messi thla lakpuitu an hrem dawn

Inrinni zan khan Barcelona chuan 4-0 in Mallorca an hneh a, he inkhelah hian Messi hming chuanna Argentina jersey hain fan pakhat chu khelmualah a tlanlut - hrem a ni dawn. 

Mallorca khelmuala inkhelah hian Lionel Messi ngaisangtu hi entu awm lo inkhel a ni chungin khelmualah a tlan lut a, Messi hlat chungin a in selfie pui!

La Liga chuan Messi fan pakhat chet dan hi an hrethiam lo a, a chet dan chu thilsual lian tak a nih thu an sawi. 

Spanish top flight league chuan thuchhuah siamin, "He inelna zahawmna hi a ti bawrhbang a, midang hriselna chu dinhmun hlauhawmah a dah bawk a ni," an ti. 

French rawlthar, Mallorca-a cheng hian  radio station Cadena Cope-in an kawmnaah hun rei tak aṭanga Messi hmuh a lo tum tawh thu sawiin, "Barcelona leh Mallorca an inkhel dawn tih ka hriat aṭang khan he thil hi thlentir ngei tumin ka lo inbuatsaih lawk tawh a ni," a ti!

Messi fan chuan stadium chhung lut tur hian metre hnih vela sang bang hungna chu a lawn liam thu a sawi bawk - a ngaihsan em em chu hnai takah a hmuh phah a, hremna a tawrh phah dawn ta thung. 

Barcelona hian zanin dar 1:30-ah league match an khel zui dawn a, Leganes an mikhual ang.  Royal Spanish Football Federation (RFEF) leh La Liga chuan June 7 khan league match hmabak la awm zawng zawngah inkhelh hma minute khat chu ngawi rengin an ding dawn tih an puang. 

Minute khat ngawi renga an dinna chhan hi Covid-19 vanga thite hriatrengnana tih a ni a, zanin Barcelona leh Leganes inkhelh hma pawhin minute khat chu ngawi rengin an ding leh ang. 

Spain hi coronavirus tuar nasa ram zingah an tel a, mi 27,000 chuang zetin he hri leng hi an thihpui tawh a ni.