F1 hma hun a chiang lo

Tun season Formula 1 chu tlan theih loh tur a tam avangin inelna neih dan tur siksawi leh a ngaih hmel, intlansiak tam ber chu Europe khawmualpuia neih a ngai dawn.

Australia, Monaco, Netherlands leh France ramah inelna neih theih a ni dawn lo a, tun hnaiah Azerbaijan, Singapore leh Japanese Grand Prix ten an ṭhulh ve leh bawk. Brazil, Mexico leh Texas te chu dinhmun chiang loah an ding mek.

Motorsport managing director Ross Brawn chuan, "Season chawhma lam hman dan tur chu kan ruahman tawh a, a chawhnu lam hman dan tur pawh duhthlan tur hrang hrang a awm mek bawk.

"Khawmualpui ṭhenkhatah chuan hri leng a nasa a, thunun thei an awm laiin ram ṭhenkhat tan chuan buaina liantak siamtu a la ni zel. Asia leh America khawmualpuiah kan tlan thei lo a nih pawhin Europe-ah inelna tam zawk neih kan tum ang," a ti.

F1 thuneitu lam chuan Europe-a tlan tur hian inelna pariat an ruahman tawh a, a hmasa ber atan July 5 hian Austria ramah inelna an nei ṭan ang a, a hmun ngaiah July 12 hian intlansiak an nei chhunzawm leh bawk ang.