Coach thar Gift Raikhan leh Tawia-te fiahna Aizawl FC Vs Chanmari FC

Lalbiakliana Memorial MFA Super Cup semifinal-ah vawiin tlai dar 2:00 hian MPL vawi hnih champion tawh pahnih Aizawl FC leh Chanmari FC te an inhmachhawn dawn.

I League club Aizawl FC-in season liam taa Neroca chet ṭhat puitu Gift Raikhan an lalut a, Chanmari FC-in Mizo coach zinga theihna nei sang ber zinga mi Lalruatliana Sailo an lalut thung. Lammual inkhel hi coach thar pahnih fiahna tur a ni.

Kawng awlsam
Chanmari FC-in semifinal thleng turin Aizawl khaw pawn club vek an hmachhawn a, semifinal thleng turin harsatna an tawk lo.

Tawia hote hian an match hmasa berah GSA Lungleng chu 10-0 in an hneh a, LKS Hnahlan FC (4-1) leh FC Zokhawthar (7-1) in an hneh zui a. Chanmari FC hi an result thlirin fak an phu a, amaherawhchu an khingpui aṭanga chhutin fak chiam a la hun lo.

Match hnuhnung pahnihah inkhel thunun chungin goal an chhuah ve ve a, clean sheet vawi khat chiah tihna a ni a, Aizawl FC lakah an fimkhur a ṭul ang.

Kawng bum boh
Aizawl FC kalkawng erawh club hming aṭanga thlir chuan a awlsam lo. I League club hian an match hmasa berah Tanhril FC chu 11-0 in an hneh a, hemi zawh hian MPL club pahnih Bethlehem Vengthlang FC leh Ramhlun North FC te an hmachhawn.

Gift Raikhan-a hote hian BVT hi 5-0 in an sawp a, quarterfinal-a Ramhlun North an hmachhawn ṭumin hun pangngaiah goal an khung lo a, penalty shootout-ah an chak hram.

Aizawl FC tlarhnung a la pawp lo a, match thum an clean sheet tawh a, an result hi knockout inelnaah chuan a duhawm hle.

Team ṭha vs Team ṭha
Aizawl FC hian defender tawnhriat nei ṭha Lalrinchhana Tochhawng an lalut a, anni hi Mizoramin Santosh Trophy an khelh hnuhnun bera captain a nih bakah MPL hnuhnung pahniha Chanmari FC leh Chhinga Veng FC te an champion ṭumin captain a ni bawk.

I League club tlarhnung phui theihna kawngah Rinchhana a pawimawh tih phat ruat a ni lo a, chutihrualin midfield-a Mizo club tana rinawm tlat Alfred Kemah Jaryan an neih an hlawk pui.

AFC-in midfield-ah David Lalrinmuana te an chhawr thei a, tawnhriat nei ṭha Khawlailung winger Lalrinfela chu goal nawr kawngah a ṭangkai bawk. Tlarhmaah Lalkhawpuimawia leh Jonathan Lalrawngbawla te an kawl a, Mapuia hi damlohna vanga a inlan theih a rinawm loh avangin Chanmari FC star hlui Lalruatfela Zote a rawn inlan thei bawk.

Chanmari FC lamin Shillong Lajong lama hming chher tawh Lalrammuana an lalut a, Chhinga Veng aṭangin Laldampuia an nei thar bawk a, winger ball thiam Lalṭhasiama leh tlan chak pahnih Lalmuanzova leh Vanlalbiaa te an neih sa bawk avangin Aizawl FC tlarhnung an su nghing pha ang.

Player ṭhate chawm turin Aizawl FC tan pawha khel tawh Bawngkawn tlangval Lalnuntluanga leh DSK Shivanjians Academy chhuak C. Lalhriatpuia te an kawl a, I League khel tura AFC an hawhtir defender C. Lalrosanga an ko leh tawh a, Vanlalzuia Hnamte leh R. Lalawmpuia te an neih belh a. Tun dinhmunah chuan Chanmari hi Mizo player nei ṭha ber ang hiala sawi theih a ni.

Chanmari FC
Last 32
Chanmari FC 10–0 GSA Lungleng
CFC : Laldampuia 15', 23' (P), 26', 61', 87';
Rochhingpuia 30'; R Swapana 69'; Lalmuanzova 77';
Ṭhasiama 82'; C Lalrosanga 84'
Last 16
Chanmari FC 4–1 LKS Hnahlan FC
CFC : Lalnunzama 38'; Laldampuia 39', 66', 70'
LKS : Lalrovula 84' (P)
Quarterfinal
Chanmari FC 7–1 FC Zokhawthar
CFC : Laldampuia 4', 15', 65'; Lalrammuana 7';
Ramchhuanpuia 42' (OG); Lalmuanzova 55'; Samuel Laltlanthanga 90'
FCZ : Joseph LR Sailo 57'

Aizawl FC
Last 32
Aizawl FC 11–0 Tanhril FC
AFC : Paul Ramfangzaua 5'; Lalkhawpuimawia 12', 31';
Joe Zoherliana 14'; David Lalrinmuana 16', 74';
Jonathan Lalrawngbawla 55', 66', 90';
Hmangaihkima 65', 84'
Last 16
Aizawl FC 5–0 Bethlehem Vengthlang FC
AFC : Lalrinchhana Tochhawng 6'; Lalramhmunmawia 25'; Jonathan Lalrawngbawla 36', 39'; Lalrinfela 52'
Quarterfinal
Aizawl FC 0–0 Ramhlun North
Penalty Shootout-ah Aizawl FC 5-4 in an chak