US lamah Manchester City

Premier League champion lai Manchester City chu season thar inbuatsiah nan United States-ah hun an hmang dawn a, hma hun chiang loa awm mek Joe Hart leh Oleksander Zinchenko te pwh squad-ah telh an ni.

International Champions Cup khel tur Man City hian Zirtawpniah Borussia Dortmund an hmachhawn anga, Liverpool leh Bayern Munich te nen an lan inkhel chhunzawm leh bawk ang.

Squad zinga awm England goalkeeper hi Pep Guardiola-a'n a chawr duh lo a, season hnih chhung chu Torino leh West Ham lamah loan hmangin hun a hmang tawh, season tharah chuan club thar a nei tura ngaih a ni. Wolves zawm tura sawi Zinchenko pawh zin mah se season tharah City tan a khelh a rinawm loh.

Kar hmasa lawka an lei thar Riyad Mahrez pawhin a club thar a zawm nghal a, World Cup khel tura koh loh langsar Germany international Leroy Sane pawhin US-ah a ṭhiante a zawm ang.

Spanish manager Guardiola-a'n World Cup khela thang chhuak player ṭhenkhat chu an rawn kir hman a beisei lo a, chutiah rualin France international Benjamin Mendy leh Portugues midfielder Bernardo Silva te erawh chu an match pahnihna a Reds an hmachhawn hunah chhawr hman beisei an ni.