Atletico Madrid an chak zo lo

Season thara Champions League khel tura an elpui Getafe an tlawm tih hre sain Atletico Madrid inlan mah se Athletic Bilbao khelmualah an chak thei chuang lo a, 1-1 a inhnehtawkin inkhel an ṭin. 

Bilbao captain Iker Muniain chuan mualneitu an ni tih pholangin minute 37-naah goal hmahruai a khung a, mahse a chungnung zawk erawh an ni rei lo hle. 

Atletico striker rorum Diego Costa chuan minute hnih hnu lawkah an si phurh a rawn sut a, Atletico hmeichhe team-a midfielder Virginia Torrecilla tan a goal khung hi a hlan zui. 

October 19 hnua a vawi khat nana goal khungtu Costa hian Torrecilla jersey chu la chhuakin a pharh a, May thla khan Torrecilla hian thluak cancer vangin zai a tawk a ni. 

Atletico hian goal dang khung theihna remchang pawh an nei a,  mahse Bilbao keeper Unai Simon chuan Atletico defender Santiago Arias shot chu ṭha zetin a dang a, 1-1 in inkhel a tawp. Champions League last 16 aṭanga Liverpool hnawtchhuaktu Atletico tan Bilbao an lenchilh hi March 11-a Anfield an luhchhuah hnua an match hmasa ber a ni a, an 'phurna' in a kiansan hman niin a lang.