Alisson manah Liverpool leh Roma inrem

Premier League club Liverpool-in sum ren an tum lo - AS Roma goalkeeper Alisson chu pound maktaduai 66.8-a lalut turin Italian club hi inremna an neihpui a, he thuziak i chhiar meuh chuan Liverpool player a ni tawh hial ang.

Kum 25 mi goalkeeper hian 2016-17 season khan Roma a zawm ve chauh a, mahse match 11 chiah a khel. Season hmasa khan Roma-ah hmun pawimawh a chang chho a, khawvela goalkeeper langsar ber pawl a ni tawh.

World Cup khelh zawh takah khan Brazil tan si ban nghaktu rinawm a ni a, match nga an khelhah inlan kim vekin match thumah goal a chhuah lo. Liverpool hian pound maktaduai 62-in an dawr zet a, Roma phalna zatin an inrem ta zawk.

Alisson hian Liverpool a pan chuan khawvela goalkeeper manto ber a ni dawn tihna a ni. Kum 2001 khan Juventus chuan Parma aṭangin Gianluigi Buffon chu pound maktaduai 47 bawr velin an lei a, Alisson chuan hei hi a khum ang.

Season hman zawh takah khan Liverpool hian Champions League final an lut a, goalkeeper Loris Karius chetsual avanga goal hnih chhuahin Real Madrid lakah 3-1 in an tlawm.

Kum 25 mi goalkeeper hi a insiamṭhat phah lo. pre season friendly-ah tun hnai lawk khan Tranmere lakah a chetsual vangin holam takin goal a chhuah leh a, German keeper thlakna turin Jurgen Klopp-a'n Alisson lam a hawi ta a ni.