Anthony Joshua hmachhawn tur a chiang

Deontay Wilder nena an in hmachhawn hun tur khawvelin a nghah ṭhup laiin Anthony Joshua hmachhawn tur a chiang a, Russian boxer Alexander Povetkin nen September 22 khian an inhnek dawn.

Joshua hi Wilder nen langsar takin incho ṭhin mah se Povetkin hi World Boxing Association (WBA) chuan hmachhawn turin an ti a, kum 38 mi boxer hi a hmachhawn dawn ta zawk a ni.

March-a New Zealand boxer Joseph Parker a hneh hnua la inlan leh lo Joshua chuan, "Ring chhunga kir hlan ka nghakhlel tawh takzet a, March kha chu a rei tawh mah mah a ni," tiin inhnek a châk tawh thu a sawi.

Tu nge Povetkin?
Feet 6 leh inches 2-a sang Povetkin hian professional boxing a luhchilh hnuah vawi 35 inhnek a hmachhawn a, vawi 34 hnehna changin vawi khat a tlawm a, vawi 24 a khingpui a knockout -a hneh loh awmchhun hi boxer ropui chawl ta Wladimir Klitschko a ni.

Povetkin hian kum 2004-a Athens-in Olympic a thlen ṭum khan super heavyweight-ah gold medal a la a, Lon­don 2012-ah khan super heavy­weight-ah vek hian Joshua chuan gold a la ve bawk - Olym­pic champion hlui pahnih an intawng dawn tihna a ni.

Vawi 21 inhnek a hma­chhawna la tlawm miah lo Joshua chuan, "Povetkin hi boxer ṭha tak a nih avangin inbuatsaihna pawh ṭha taka ka kalpui a ngai dawn a, a tawnhriat enin zuam chi ngawt a ni dawn lo," a ti a, a fimkhur tur thu a sawi.

Povetkin a ṭawng pawr
Povetkin hian March thla khan Joshua leh Joseph Parker-te inhnek ṭumin bout hmasa lamah David Price chu a lo knock out tawh a, he thil thlentir tur hian round nga bak hun a mamawh lo.

WBA heavyweight cham­pion Alexander Povetkin chuan, "Anthony Joshua hian kawnghren kawl lai pali a nei a, a vai hian chhuhsak vek ka duh a ni," tiin a sawi a, a hna erawh a awlsam dawn lo.

March 2017 khan Povetkin hi damdawi hman phal loh a hmang tih hmuhchhuah a nih avangin hrem a lo ni tawh a, kum khat chhunga vawi hnih manchhuah a nihna ni mah se thla kaw hnuah inhnek leh thei turin hrem a nihna chu hlihsak a ni.

Engtikah nge Wilder
Hun rei tak chhung Wilder hming lamrik a nih tawh avangin Joshua leh Povetkin inhma­chhawn tur hian boxing ngainatu tam tak a ti hnual a, Wilder nen ngei inhnek se an duh.

Mahse, WBA-in Povetkin hmachhawn tura an tih miau avangin Joshua-a'n Russian boxer hi a hmachhawn hmasak phawt a ṭul a, hnehna a chang thei a nih chuan a hmaa ding leh tur thlan kawngah thuneihna sang zawk a nei thei ang.

Wilder hian pound makta­duai 37.2 hlawha USA-a inhnek puiah Joshua hi a lo sawm tawh a, British boxer team lam hian United Kingdom huam chhung ngeia inhnek an duh thung.