Iceland coach a bang

Heimir Hallgrimsson chu Iceland coach a nihna a ṭangin a bang. Hallgrimsson hian kum sarih chhung an ram team hi a enkawl hman a, inelna a hmachhawn hnuhnung ber chu World Cup 2018 kha niin group stage an paltlang zo lo.

Kum 51 mi Lars Hall­grims­son hian Lagerback thachhawngdawlin 2011 khan an ram team hi a en­kawl ṭan a, 2014 khan mana­ger nghet niin 2016 Euro-ah kan an ram chu quarterfinal an hruai thleng hial.

World Cup-ah khan ram te ber ni chungin an inlan leh a, an match hmasa berah Argentina nen 1-1 in inhnehtawk thei mah se Croatia leh Nigeria an ngam loh avangin last 16 an lut phak lo. Mipui 330,000 vel chauh chenna an nih avangin World Cup an khel phak ringawt pawh chanchin ropui a tling tho.

Thuchhuah siamin Icelandic Football Asso­ciation chuan, "Iceland FA chuan Heimir Hallgrimsson chu kan coach a ni thei tawh lo tih kan sawi chiang, hei hi ama duhthlanna a ni. Kum sarih chhung ropui taka min lo kaihhruai tawhnaah lawmthu kan sawi," an ti.

Hallgrimsson hi dentist a ni a, national team a enkawl chung hian part time-in a hna ngai hi a thawk tel tho! Hallgrimsson chuan, "Kan ramin a vawi khat nana Euro leh World Cup kan khelh theih nana tha thawhtute zinga ka tel thei kha ka hlim hle, hriatreng tur sulhnu kan hnutchhiah a ni," tiin a sawi.

Iceland hi tun hmain football thiam ram tia hriat ni ngai lo mah se tunah chuan khawvel hriat an ni tawh a, September 8 hian Switzerland nen UEFA Nations League an khel dawn a ni.