Sindhu hmabak a hautak dawn

BWF World Cham­pionship 2018 chu July 30 aṭanga August 5 chhung hian Nanjing, China-ah khelh a ni dawn a, Indian shuttler zingah P V Sindhu hmabak a awlsam dawn lo hle.

Nikum World Cham­pionship final-ah khan Sindhu leh Nozomi Okuhara te an intawng tawh a, kuminah pawh player pahnihte hi an kal tluang chho a nih chuan quarterfinal-ah an insu dawn. India nula tan champion lai Okuhara hmachhawn hi thil chakawm tak a ni lo ang.

Season hmasa khan Okuhara hi a khup na vangin a buai ve deuh reng a, tunah erawh a hliam a dam tawh. Kar hmasa mai khan Thailand Open khelin final-ah Sindhu a hneh a, nomawi a chawi.

Rio Olympic silver medalist Sindhu hi first round-ah a bye a, Indonesian nula Fitriani Fitriani leh Linda Zetchiri te inkhel a chak zawk nen second round-ah an inkhel ang.

Thawhlehni khan inkhel tur hi pawh a ni a, Indian shuttler zingah Saina Nehwal pawhin final lut tur chuan world number 1 hlui Ratchanok Inthanon a paltlang a ngai dawn.

Kum 28 mi Saina hian tun hnaiah result nei ṭha tawk lo mah se tun hma­in sulhnu ṭha a nei tawh. Commonwealth Games champion Saina hian World Championship-ah hian silver leh bronze medal a lo vaw chhuak tawh, ani pawh hian first round khelh a ngai dawn lo a, Sabrina Jaquet leh Aliye Demirbag te inkhela chak zawk a bitum thung ang.