United-in City an elpui pha ang - Rooney
Manchester United legend Wayne Rooney chuan a club hlui chu Premier League season tharah nomawi chawi turin champion lai Manchester City a elphak a rin thu a sawi.
English striker hian Everton chhuahsanin MLS club DC United a zawm a, kum thum leh a chanve daih contract a ziak. Rooney chuan a nupui fanau ten zawm dawn lo se chuan United States a pan loh tur thu a sawi bawk.
Premier League lam
Kum 32 mi Rooney hian Manchester United tana 2004-2017 chhung khan a khel a, goal 253 khung sakin club tana goal khung tam ber a ni.
Rooney chuan, "United-in City an elphak lohna chhan tur a awm lo. Season liam taah kha chuan City kha an khel ṭha fal a, chutihrualin United pawhin nomawi chawi lo mah se season ṭha tak an hmang. Mi tam takin an khelh dan sawisel mah se United hian league nomawi hi an chawi leh vat ka beisei a ni," tiin a club hlui chungah beisei a nei sang hle.
Everton-in an pawi ti lo
Rooney hian a inzirchhuahna Everton chu July 2017 khan a pan leh a, season liam ta khan league match 31-ah goal 10 khung mah se match hnuhnung 15-ah goal a khung lo a, Sam Allardyce-a'n midfield lama a chhawr vangah a ngaih theih.
English striker chuan, "Everton-in chiang takin min hrilh a, duhtu ka nei a nih chuan chhuah an phal. Manager thar an nei a, coaching staff an thlak dawn avangin player pawh an thlak a ṭul a, an thutlukna hi ka hrethiam. Kei pawhin bench-a ṭhut ai chuan khelh ka duh zawk," tiin a sawi.
Chhungkua a ngai pawimawh
Washington-ah hian Rooney-a'n a nupui Coleen bakah a fa pali te a hruai vek dawn. Rooney chuan, "Ka chhungte hian England aṭanga chhuah hi duh lo se chuan tuna thutlukna hi ka siam lo ang. Washington hi Los Angeles leh New York te nen ka buk a, kan chhungkaw sei lenna tura ṭha bera ka ngaih ka thlang," tiin football bakah chhungkua a dah pawimawh thu a sawi.
English striker hi a contract a zawh hunah chuan kum 36 mi a ni tawh dawn a, a hmalam hun a thlir ṭan nghal. Rooney chuan, "DC United nomawi chawi pui hi ka tum ber a ni a, chumi zawh lam erawh ka ngaih pawimawh ber ni lo mah se ka thlir ṭan tawh. Coaching certificate ka nei ang a, chumi zawhah chuan coaching, management emaw TV lam ka zawm ang. Football hi hun rei tak ka chenchilh tawh a, ka kalsan mai thei lo ang," tiin football-a inhman chhunzawm zel a tum thu a sawi.