World Cup 2018 Chân loh khâna lo chhuakte chu

Russia World Cup 2018 khelh zawh ni tawh mah se a zunzamin football khawvel a la kiansan thei meuh lo. Player langsar tak tak zingah beisei phak lo an awm laiin rin loh lam aṭanga rawn lang an awm bawk a, a tira kan hmelhriat loh tam tak hi chiang zawkin kan hmelhriat chho ngei dawn niin a lang.

Hetihrual hian tun hma angin club-in 'risk' sang tak an la meuh tawh lo a, World Cup-a khelh dan aṭang ringawta teha player lakluh hlauhawm zia hrechiangtu chu Europe-a club lian te an ni.

Kum 2002 khan Liverpool chuan Senegal tana World Cup duhawm tak hmangtu El Hadji Diouf an lalut a, Reds tana a season hmasa berah match 79 chiah khelin goal ruk chiah a khung–hei hi entirna pakhat chauh a ni a, club tam takin World Cup an thlir rualin an fimkhur ang.

Hakim Ziyech (Morocco midfielder)

World Cup 2018-a team vanduai ber pawl chu Morocco an ni–hun pek belha goal an chhuah avangin Iran lakah an tlawm a, Spain lakah an chak dawn nia a lan hnuah minute 91-naah goal an chhuah leh bawk.

Morocco vanduai karah hian Hakim Ziyech a langsar thung a, kum 25 mi Ajax midfielder hi Liverpool leh AS Roma-in lakluh an duh niin an sawi.

Netherlands-a khel player-te chawimawina sang ber Dutch Footballer of the Year-ah Ziyech hi season hmasa khan thlan a ni a, 2014-15, 2016-17 leh 2017-18 khan Dutch league-a assist ngah ber a ni vek.

Benjamin Pavard (France defender)

Kum 22 mi defender hian 2016-17 season kha chuan Bundesliga second division lamah a hun a la hmang a, 2018 a thlen meuh chuan world champion a ni ta!

Argentina laka goal ropui khungtu defender hian November 2017 khan France tana a match hmasa ber a khel ve chauh a, season hmasa khan VfB Stuttgart tan Bundesliga-ah a inlan ve chauh–right back, centre back leh midfield-a chhawr kawp theih Pavard hi Tottenham, Manchester City, Arsenal leh Bayern Munich ten lakluh an duh.

Andre Carrillo (Peru winger)

Benfica winger hi season hmasa khan Watford-ah a khel a, beisei erawh a phak lo. World Cup-ah erawh a theihna san zia kan hmu a, Premier League club ṭhenkhat chil a tipût.

Sporting Lisbon tan pawha lo khel tawh winger hi Everton leh Premier League kai thar Fulham te chuan lakluh tumin an dawr dawn niin an sawi.

Hirving Lozano (Mexico winger)

World Cup-a Lozano hmuhnawm zia inhrilh nawn kan ngai lo. Kum 22 mi winger hian Germany lakah goal a khung a, South Korea laka Javier Hernandez goal khung tur siamsak tura field chanve aṭanga a tlan kha World Cup zawh thleng pawhin sawi zui a la hlawh ta reng.

PSV Eindhoven winger hi Manchester United, Tottenham, Real Madrid leh Barcelona te nen sawizawm a ni a, season hmasaah PSV tan goal 19 a khung theih avangin World Cup-ah chauh lo pawh a thiam tih a chiang tawh.

Cho Hyun-woo (South Korea goalkeeper)

Kum 26 mi goalkeeper hi K League club Daegu FC si ban nghaktu a ni a, World Cup group stage-ah a chet ṭhat avangin European club-te chil a ti put hle. Cho-a hian group stage-ah vawi 12 ngawt save neiin save ngah lamah Mexico keeper Guillermo Ochoa (17) chiah a tluk lo.

Hetihrual hian South Korea-ah mipa kum 18-35 inkar te chu an ram sipaiah kum hnih tal an ṭang tur tih a ni a, he dan avang hian Europe club ṭhenkhat chu an tim deuh mai thei–infiamna huanga ti ṭha te tan ngaihnathiamna erawh a awm tho a, Park Ji Sung pawh kha sipaiah a ṭang hman lo.

Harry Maguire (England defender)

Leicester City defender hi Tottenham, Manchester City, Manchester United, Liverpool leh Chelsea ten an duh vek nia sawi a ni a, England tana a khelh dan enin a awm lo hran lo.

Russia-a inelna neih zawh takah khan ball kang inchuhah vawi 41 ngawt a hlawhtling zawkah a ṭang a, player pakhat chiah tluk loh a nei.

Yerry Mina (Colombia defender)

Barcelona defender hi Everton, West Ham, Tottenham leh Liverpool ten lakluh an duh vek a, Barcelona-ah khal mah se coach Ernesto Valverde ngainat zawng a ni lo.

Kum 23 mi defender hian World Cup khelh zawh takah khan goal thum a khung a, World Cup-ah Mina aia defender goal khung hnem an la awm lo.

Aleksandr Golovin (Russia midfielder)

Kum 22 mi midfielder hi World Cup hma aṭangin ngaihven a hlawh tawh a, Arsenal, Juventus leh Chelsea ten lakluh an duh vek niin an sawi.

CSKA Moscow midfielder hian Russia match hmasa berah goal khat khungin assist vawi hnih a nei a, quarterfinal an thlen nan player ṭangkai tak a ni bawk–set piece pet thiam a ni.