Cahill-a'n international football a chawlhsan ta

Australia tana World Cup pali-a inlan thei awmchhun Tim Cahill chuan ram tana inkhelh a chawlhsan thu a puang a, Socceroo jersey hain a hmel kan hmu tawh lo ang.

Cahill chuan, "Ram tana inkhelh chu ka chawlhsan ta. Australia kawr ha chunga khelmuala inlan kha a hlutna engmahin a sawifiah zo lo ang. Ram tana ka inlan chhung zawnga in mi ṭawiawmna zawng zawngah khan lawmthu ka sawi a ni," tiin a sawi.

Everton attacking midfielder hlui hian ram tan match 107 khelin goal 50 a khung sak a, Australia tana goal khung hnem lamah tluktu an awm lo. Ram tana inlan tam lamah erawh goalkeeper Mark Schwarzer (109) chiah a tluk lo thung.

Season hman zawh taka Championship club Millwall tana khel Cahill hian 2006, 2010 leh 2014 World Cup-ah te khan goal a khung vek a, 2018-ah erawh player pawimawh a ni phak tawh lo–Peru laka 2-0 a an tlawm ṭuma a inlan kha Australia tana a inlan hnuhnung ber a ni dawn ta a ni.