Emery kaihhruai Arsenal hmel thar tur chu

Arsene Wenger hun lai aṭanga football khelh dan phung nghet nei Arsenal-in manager thar an nei tawh a, tun hma lama Gunners kan hmuh ṭhin ang lo deuh hlek kha an nih pawhin a mak lo ang – Unai Emery kaihhruai an nih tawh avangin 'Arsenal hmel thar' chu kan hmu ngei dawn.

Season thar inbuatsaih nan Arsenal hian Singapore-ah Champions Cup an khel leh dawn a, July 26 leh 28 hian Atletico Madrid leh Paris Saint-Germain an hmachhawn ang. Premier League-ah an fixture a hautak dawn, match hmasa ber atan champion lai Manchester City an mikhual ang a, London derby khel turin Chelsea an lenchilh zui dawn bawk.

Training chu

Spanish manager-in thuneihna a chan hnuah Arsenal hian ngawrh takin training an nei chho mek a, pre season training a nih avangin a hautak hle–nikhatah vawi hnih te training an nei ṭhin. Manager thununna hnuaiah player an awm a, khelmual chhunga result ṭha neih tum an nih avangin training-na hmunah pawh tih mai mai a thiang lo.

London Colney-a training an neih laiin Pierre-Emerick Aubameyang-a'n keeper Petr Cech chauh a hmachhawn tawhah goal a khung lo a, Gabonese striker hi hremna pek a ni hial! Gunners manager hian training-na hmuna a nau ten an tih theih loh chu khelmual chhungah tih a harsat tur zia a hria.

Sevilla manager hlui Emery chuan, "Ka naute hi thahrui ngah turin ka duh a, an theihna zawng zawng hlan turin ka beisei bawk. Chumi tur chuan thawhhona ṭha kan mamawh, kan nihna tak lanchhuah tir tumin theihtawp kan chhuah a ni.

"Training apiang hian tihtakzetna hmuh ka duh, chumi chuan khelmual chhungah rah ṭha a chhuah ang. Fans tan inkhel hmuhnawm chhawpchhuah kan tum dawn a, thlawpna ṭha kan mamawh bawk," tiin a sawi.

Emery hian Wenger kalphung hmasa thlak hlawk a tum tihna a nih hran lo, Manchester United manager ropui Sir Alex Ferguson a chhuah hnua David Moyes, Louis van Gaal leh Jose Mourinho ten tun hma lama Man United game ang an khel chhuak thei lo ang chu an nih a rin loh thu a sawi tel bawk.

Thurawn a la

1996 aṭanga Arsenal enkawl tawh Arsene Wenger a chhuak takah khan, a hmun ruak luah turin manager hrang hrang hming lam rik a ni–chung zingah chuan Paris Saint-Germain tana contract hmag zo hlim Emery buk a rit ber.

Spanish manager hian Gunners enkawl hna a thawh ṭan hma hian Wenger a be rawn hmasa; French pachal hian amah thlaktu hnenah hian, 'Goal venhim kawngah inthuam ṭhat' a ngaih thu a lo hrilh.

Kum 46 mi Emery-a'n tun nipui bazar chhungin player lakluh nan pound maktaduai 70 a hmang tling der tawh. Defender leh midfielder pahnih ve ve Stephan Lichtsteiner, Sokratis Papastathopoulos leh Lucas Torreira, Matteo Guendouzi bakah goalkeeper Bernd Leno a la tawh–tlarhnung thuam chakna tur vek an ni.

Hmun inchuh

Arsenal hian attacking game hmuhnawm an khel ṭhin, an tlarhnung a phui loh avangin an thleng sang hleithei lo thung. A zawna season hnih nan Champions League an khel phak lo ta a, Europa League nomawi vawi thum chawi tawh Emery-a'n engtiangin nge goal venhim a tum tih chu thil hriat chakawm a tling.

Chelsea keeper hlui Cech hi kum 36 mi a ni tawh a, a vanglai chuan khawvela a ṭha berte zinga mi ni mah se tun hma lama 'Cech' kan hmuh ṭhin ang kha chu a ni tawh lo, season hmasa pawh khan a tihsual vanga goal chhuah a awm fo.

Bayer Leverkusen aṭanga pound maktaduai 20 senga an lakluh Bernd Leno hi theihna nei sang tak a ni a, World Cup-ah khan Germany tan khel phak chiah lo mah se Bundesliga lama a chet dan en erawh chuan Arsenal first choice a nih pawhin a mak lo ang.

Rawlthar beiseiawm ni ṭhin Hector Bellerin pawh inkhel pawimawh tam takah a tawn hriat neih tawk lohna a lang ṭhin a, wing back atana hman a nihin ball cross nei thei viau mah se a line a pawp fo. Switzerland international Lichtsteiner-a'n Juventus lama a hun tawn tawhte chu Bellerin tan zirlai ṭha tak atan a chhawp chhuak thei tura beisei a ni.

Captain Laurent Koscielny chu season hmasa tawp lama a hliam vangin kumin December thla thleng chu a chawlh a ngai dawn a, Borussia Dortmund defender rinrawl Sokratis Papastathopoulos a pawimawh nghal ang. Greece international din pui turin Shkodran Mustafi a nei sa bawk.

Number 10

Jack Wilshere a chhuah tak vangin Mesut Ozil-a'n Arsenal jersey number 10 a ha tawh dawn. Germany international hi World Cup khelin Russia-ah kal mah se Singapore Tour-ah a tel thei dawn.

Real Madrid midfielder hlui Ozil hian tharum ngah lo mah se 'skill' a nei ṭha tawk. Ani hi striker hnunga ding tur a ni dawn a, a hnathawh tur chu 'number 10' hna a ni ang. Ozil kiangah hian Aaron Ramsey a awm dawn bawk a, anni pahnih hian Arsenal tana match 14 a khelh

aṭanga goal 10 khungtu Pierre Emerick Aubameyang an chawm ang.

Arsenal buaina ṭhin lian tak pakhat chu defensive midfield niin, Granit Xhaka hman ṭhin a ni. Swiss international hian tihsual a ngah ṭhin bakah card hmuh a ching–Bundesliga lama a theihna a tih lan ang kha Premier League-ah hmuh tur a la awm meuh lo.

Xhaka elpui turin Lucas Torreira lak a ni a, Uruguay international midfielder hi palian tak ni lo mah se tharum a ngah; World Cup-a a khelh dan thlirtu Gunners fans mit a tlung ngeiin a rinawm–khelh ṭhat loh chang nei Xhaka tan hmun nghet chang tur chuan thawhrim bakah chetsual loh a pawimawh ang.

Arsenal captain hlui Patrick Vieira nena an khaikhin France U-20 international Matteo Guendouzi erawh a lakah an beiseina sang viau mah se a la patuai deuh a, rinrawl a nih phak a la rinawm loh, intuaihriamna tur kawng a la ngah deuh.