Chhinga Veng hmaah Mizoram Police
Vawiin tlai dar 2:00 hian Lammualah Lalbiakliana Memorial MFA Super Cup semifinal khelh a ni dawn a, champion lai Chhinga Veng leh Mizoram Police te an inhmachhawn dawn.
Season liam ta khan Police-in Super Cup semifinal an thleng a, penalty shootout-ah Chanmari West an hneh lo. Chhinga Veng erawh Lalsangzuala Hmar hnuaia an kal fawr chhoh laiin final-ah Police hneh loh West Warriors hi 5-0 in an sawp.
Chhingcows an chungnung
Mizoram Police-in nikum Super Cup-ah Chhinga Veng thlen chin an thlen phak loh avangin an inhmachhawn lo. I Day Football-ah erawh group khatah awmin Chhingcows hian 5-2 in an sawp a, MPL6-ah pawh round 1-ah inhmachhawn nghalin 4-1 in Chhinga Veng an chak.
Police an talbuai a, MPL aṭanga relegate thei dinhmuna an din hnuin coach Lalbiaksanga Colney-in a chhan chhuak. Amaherawhchu, Armed Veng pa BS-a'n Police a enkawl hnuah pawh MPL-ah hian intawng lehin Chhinga Veng bawk an chak a, an chakna zat erawh 2-1 chauh a ni.
Season liam taah Chhingcows hian MFA Super Cup, I Day Football leh MPL nomawi chawi chungin an khar a, Mizoram Police-in Super Cup leh MPL-ah semifinal thlengin I Day Football-ah group stage an paltlang lo.
A danglam tawh
Chhinga Vengin treble champion an nih theihna tura player pawimawh R. Malsawmtluanga, Malsawmfela, R. Laldinliana leh Lalrinchhana Tochhawng te an chân a, coach Lalsangzuala Hmar-in la enkawl mah se inelna pathuma champion leh tur chuan vanneihna vawrtawp an mamawh tawh niin a lang.
Chhingcows hian semifinal thleng turin Aizawl DFA hnuaia first division club Kanan FC nen an inhnehtawk a, penalty shootout hmangin an chak hram. Mizoram Police pawhin Chhinga Veng duhlai MS-a leh Sawmfela bakah Chanmari FC aṭangin F. Lalmuanawma te lalut mah se tun inelnaah hian Police zawm tharte hi squad-ah an awm lo.
Police tan a ṭha sa bawk te an la ṭha a, Lalfakzuala, Lalbiakhlua, V. Lalṭanpuia, Lalramtharmawia leh Lalsangbera te an ṭangkai a. Damlohna vanga match hmasa lama inlan thei lo F. Lalrinpuia a inlan theih chuan Mizoram Police-in season liam taa ṭum thum ngawt an hneh loh Chhinga Veng hneh turin an dinhmun a ṭha sawt ang.