LG Independence Day Football

Mizoram Football Association leh LG Electronics ṭangkawp chuan July 27, 2018 aṭang hian Aizawlah LG Independence Day Football Tournament (LG I Day Cup) an buatsaih dawn a, August 15-ah final khelh a ni ang.

Mizoram Premier League team pariatte bakah sawm bik team pahnihte inelna tur LG I Day Cup chungchangah nimin khan LG Electronics hruaitute leh MFA aiawhte an inkawm a, hmalak dan tur an sawiho a ni.

LG Electronics aiawhin Amit Gujral, LG chief marketing officer; Ranjit Kumar, head - channel management leh mi pawimawh dangte an lo kal a, LG I Day Cup hlawhtling taka kalpui a nih theih dan tur an sawiho.

Amit Gujral chuan, "Mizoram football hmasawnna turin theihtawp chhuah kan tum a, thawhhona ṭha tak kan nei tur hi kan lawm takzet a ni. Hei hi tuna kan thawhhona mai a ni dawn lo a, hun rei zawk atan thawhho zel kan duh," tiin a sawi.

MFA honorary secretary Lalnghinglova Hmar chuan, "Khawvel huapa hroat hlawh LG Electronics-in MFA-te ring tawka min thawhpui tur hi kan lawm a, kan thawhhona tihlawhtling tura an hotu liante an lo kal hial hi kan lawm takzet a ni. LG nen hian I Day Cup-ah mai ni lo lian zawka kan thawhho theih ngei kan beisei a ni," a ti.

LG I Day Cup-ah hian team 10 awmin group pahnihah then an ni ang a, a tawpah group-a a sang pahnihin semi final an khel ang. July 25 zan hian LG I Day Cup khuh hawnna (LG I Day Cup Launch) neih a ni dawn a, inkhel tur pawh fel (tie draw) a ni ang.