Hei le Maurizio a inlar ṭan e!

Chelsea boss thar Maurizio Sarri chuan, "Engtia koh nge i duh?" tia journalist zawhna chhangin, "Maurizio tiin min ko ru," a ti a, Jose Mourinho anga 'The Special One' in tih a tum lo.

Kum 2003-a Roman Abramovich-a'n Chelsea a lei hnuah Blues hian manager nghet vawi kua an nei tawh a, Stamford Bridge hi manager thlanmual ang hialin an sawi.

Sarri erawh a hlauthawng lo. Italian manager chuan, "Hlauthawng taka awm ṭhin mi ni ila football coaching hna hi ka thawk lo ang. Kan hnaah chuan risk a tam a, chutihrualin lungawina pawh tam tak min pe. Hlauhthawnna ka nei lo," a ti.

Hazard khawiah maw?

World Cup khelh zawh hlimah Eden Hazard-a'n Chelsea a chhuahsan mai theih thu a sawi a, Sarri thusawi erawh a dang thung. Napoli boss hlui chuan, "Hazard hi Europe-a player ṭha bik zingah a tel phak a, hma a sawn zel theih nan ka puih theih ka beisei," a ti.

Sarri chuan player chhuah duhte phone kaltlanga biak a tum loh thu sawiin, "An hmel hmu loa phone hmanga biakin awmzia a nei lo ang. An mitah ngei en chunga inbiakna neihpui ka duh a ni," tiin phone hmanga tumah a thlem loh tur thu a sawi.

England defender Gary Cahill chu Stamford Bridge chhuahsan tur zinga sawi a ni a, hei hi Sarri-a'n Juventus centre-back Daniele Rugani lakluh a tum vang niin an sawi. Mahse, Sarri chuan, "Cahill hian he club tan hnathawh tur a la nei a ni," a ti.

Mangṭha transfer bazar!

Chelsea boss chhuak ta Antonio Conte-a thusawi langsar tak chu transfer bazar-a thu a nei lo kha a ni a, Sarri erawhin buaina a nei lo niin a lang thung. Kum 59 mi manager chuan, "General manager ni loin khelmual manager ka ni.

"Transfer bazar chungchang ngaihtuah peih lo manager tlemte zinga mi ka ni a, transfer chungchang sawi hi ka peih lo. Ka tuina a ni lo," a ti–Sarri hian sapṭawng thiam mah se a press conference-ah Italian ṭawng a hmang ṭhin.

Sarri chuan, "Sapṭawng ka thiam tawk lo a, ṭawngkam chhehsual palh ka hlauh avangin ka fimkhur a, min hriatthiam ka ngen a ni. Rei loteah sapṭawngin press conference ka la nei thei ang," a ti.

Pa ṭha Sarri

Coach hna a chelh hmaa bank-a hna thawk ṭhin, a meizial heh larpui tak coach hi a che fuh reng bik lo. Manchester City boss hlui Roberto Mancini lakah ṭawngkam mawi lo tak a lo hmang tawh a, March khan hmeichhe journalist lakah a ṭawngkam mawi lo avangin ngaihdam a dil a ṭul.

Sarri chuan, "Mihring chuan tihsual kan nei thei vek a, khatih hunlaia ka hun duhawm lo tawn te kha ka thinrim lai veka thleng a ni a, ka nihna tak tak a ni lo.

"Pa lang tlang tak mai ka ni a, midang nena buaina neih ka duh lo. Chelsea-a ka cham chhungin ka ṭhatna tam tak in hmuh ka beisei," a ti.

Sarri pui tur Zola

Chelsea legend Gianfranco Zola chu Stamford Bridge-a Maurizio Sarri pui turin an lalut a, assistant manager hna a chelh dawn. Kum 52 mi manager chuan, "Ka tan chuan thil ropui tak a ni a, he hmun ka rawn pan thei hi ka lawm a ni," a ti.

Zola chuan sawi zawmin, "Player ka nih laia ka theihna zawng zawng ka pe ang khan he club tan hian ka theihna ka hlan dawn a, Maurizio nena hlawhtlinna chan a chakawm takzet a ni," tiin Blues tan nomawi chawi a tum.

Chelsea tan league match 312-a khelha goal 80 khungtu Zola hian West Ham, Watford leh Italian club Cagliari te a lo enkawl tawh a, December 2016 khan kum hnih leh a chanve chhung atan Birmingham City zawm mah se result ṭha a neihpui theih loh avangin thla li hnuah a bang.