Goal 7 a lut - Chanmari-in Aizawl FC hneh

Lalbiakliana Memorial MFA Super Cup-ah Chanmari FC-in final thleng turin nimin tlai khan Aizawl FC 4-3 in an hneh. Lammuala inkhelah hian hun pangngaiah 2-2 in an inhnehtawk a, extra time-ah goal thum dang lutin Chanmari FC an chungnung ta zawk.

Final-ah Chanmari hian July 23, Zirtawpni tlai dar 2:30 khian vawiin tlaia champion lai Chhinga Veng leh Mizoram Police inkhela chak zawk an hmachhawh ang.

Nomawi mamawh

MPL ṭantirhah Mizoram Police an ṭha a, Dinthar an dingchang. Hemi hnu hian Chanmari FC an kal fawr a, Aizawl FC-in chelh dingin AFC hi I League khel tura an tlin avangin tualchhung club langsar ber an ni.

Aizawl FC hian I League nomawi hial an chawi avangin Chanmari FC chungah an awm a, amaherawhchu CFC hi H. Vanlalthlanga hnuaiah tualchhung nomawi chawi theih zawng zawng an lo chawi tawh avangin AFC hi an chung en bik lo.

Amaherawhchu, season liam ta khan Chhinga Veng FC an rawn lang thut a, tualchhung football-a hming langsar pahnih Aizawl FC leh Chanmari FC ten nomawi chawi loin season an hmang zo. Club pahnih hian tun season-ah nomawi chawi ngei an tum a, MFA Super Cup-ah pawh inelna ṭan hmaa champion tura rinkai pahnih an ni.

An intawng ta

Chanmari FC-in ball an chang tam nghal a, an goal bawh na zawk. Minute 20-na lekah AFC defender Lalrinchhana Tochhawng handball vanga an penalty hmuh chu Chanmari FC tan Laldampuia'n hmahruai nan a khung.

Aizawl FC-in goal an chhuah hnuah an insiamṭha a, minute 34-naah David Lalrinmuana freekick hlawhchhuah chu V. Lalchhuanawma'n petin wall a per hnuah goal-ah a lut, keeper Lalruatpuia'n (Lalmama) a en liam. Chanmari FC-in freekick aṭang bawkin an chhang let a, minute 39-naah R. Lalawmpuia freekick vawrhluh chu AFC defender pahnih Hmingthanmawia leh SR.Lallawmawma ten inringthulin keeper Lalremruata an tihbuai tel avangin goal-ah a lut.

Second half-ah AFC coach Gift Raikhan-a'n risk lain defender aiah striker Lalkhawpuimawia a dah belh a, an siphurh sutna erawh freekick a ni. Yard 24 aṭangin freekick specialist David Lalrinmuana chuan mawi zetin a khung a, Chanmari keeper Lalmama dem theih a ni lo.

Minute 90 chhungin team pahnihin goal hnih ve ve an khung a, goal zawng zawng hi dead ball aṭanga lut vek a ni a, ball pet thiam an langsar. Aizawl FC striker JoJo-a'n chakna goal khung theihna tur a nei a, crossbar a tauh per avangin 2-2 in hun pangngaiah an inhnehtawk.

Substitution awmze nei

Chanmari FC coach Lalruatliana Sailo-in extra time-ah Rochhingpuia a luhtir a, Chanmari fapa rangkachak tiha sawi ṭhin hian danglamna a thlen.

Tawia hote hian counter attack hmangin a vaw let a, Chhinga ke aṭanga ball chhuak chu Lalmuanzova'n a tlan chakna hmangin minute 99-naah a khung. Minute hnih hnuah counter attack hmang bawkin Chanmari tan Dampuia'n a khung a, a bul ṭanna chu Chhinga tho a ni.

Aizawl FC goal nawr a na a, extra time-a Chanmari-in goal an khung hma hian Mapuia'n crossbar a tih per a, an vanduai. Goal hnih an phur hnuah Jojo-a'n hun ṭha a hlah a, amaherawhchu hun tawpah erawh Electric Veng tlangval hian a khung ta tho a, result erawh a thlak danglam ta lo.

Chanmari FC coach thar Tawia'n fiahna hautak a hmachhawn hmasak berah I League club an hneh a, Neroca kalsana Aizawl FC zawmtu Gift Raikhan erawh tualchhung inelna hmasa berah bukin a awm a, a tling zo lo.