I hriat ngai loh Lo neitu fanu Hima Das chu

"Zan dar 9:00 velah a nu a rawn phone a, hun rei lote hnuah an intlansiak tur thu a rawn sawi, TV aṭanga en hlan kan nghakhlel em em a, mahse darkar li chhung current a awm loh avangin kan en thei lo. News

aṭangin hnehna a chang tih kan hria a, lawm avangin kan biangah mittui a luang. Khaw pum chu lawmnain a khat a ni," tiin kum 18 mi Hima Das-i nutei Puspalata chuan a sawi.

Assam ram chhunga thingtlang khaw pakhat Kandhulimari, Dhing aṭanga rawn chawr chhuak Hima Das chanchin hi tunlai India media-te titi tui ber pakhat a tling. Buh hmuna Tractor khalh kual ṭhinin World U20 Championships 2018, 400m intlansiaka gold medal a hlawhchhuah theih dan hi a nep lo–'Thawhrimna nen chuan hnehna a chan theih' tih thu rawn ti diktute zinga mi a ni.

Chhungkaw hung tak, member 18 awmna aṭanga seilian Das-i'n IAAF World U20 Championship-ah India tan mellung pawimawh a phun a, hmeichhe 400m huangah pakhatna a ni. Hnehna chang tur hian second 51.46 a hmang, Indian infiammi ten huang hrang hrangah ropuina lo chang tawh ṭhin mah se, khawvel huap intlansiak bikah chuan Das hi gold medal hlawh chhuak thei hmasa ber a ni.

Hnehna chu

Inelna hi Tampere, Finland-ah neih niin, July 12, Ningani zan kha Das inlan hun a ni. Das hian lane 4 aṭangin intlansiak bul a ṭan a, athletes dang pathumin ani aia kawng kawi an thlen hma theih avangin a dinna hmun hi atan bul ṭanna ṭha a ni lem lo.

400m tlan tur zinga 300m an tlan thlen chuan Australian tleirawl Ellen Connolly leh United States aiawhtu Taylor Mayson te an tlan ṭha hle a, Mayson hi hnehna chang tlang thei tura ngaih a ni. Mahse, bul ṭan fuh lo Das a beidawng bik lo, 100m chauh tlan tur a awm tawh tihah ropui taka rawn put chhuakin a hma a awm pathum a tlan pel fai vek!

Dinhmun ṭha lo zawk aṭanga thawhchhuah leh hi Das-i tan thil thar a ni tawh lo, thla hmasa mai khan state hrang hrang inelnaah a hnung lama awm chungin hnehna a lo chang tawh; Guwahati-ah hian second 51.13 chhungin a thleng thei a, a tlan ṭhat ber ṭum a ni. Commonwealth Games 2018-ah khan second 51.32 chhunga thlengin parukna dinhmun a luah tawh bawk–a record hmasa pahnih tluk chiah lo mah se gold la turin a tawk tho.

Hnehna a chan hnuah Das chuan, "A tawp lam 100m hi ka chakna bul a ni reng ṭhin, stadium chhung boruak a nuamin min ṭantu au thawm tam tak khan chakna leh phurna min pe a ni," tiin a sawi. Athletics Federation of India president Adille Sumariwalla pawhin Indian athletic tan hun hlu leh chhinchhiah tlak bik a nih thu a sawi ve bawk.

Buh hmun aṭangin

9 January 2000 khan Das hi a piang a, Assam ram chhunga Nagaon district-a awm an ni. Lo neitu Ronjit leh Jonali Das te fa pali zinga naupang ber a ni, an chhawngkaw eizawnna ber chu buh chin a nih avangin Dasi-i hian a naupan hun lai chu buh hmunah a hmang tam hle ang tih a rin theih.

A seilenna hmunin a zir bawk a, a nu leh pa eizawnna pawh kum naupangte ni chungin a hriat bel pui hman hle. Das chuan, "Class X ka nih lai khan tractor khalh hi nuam ka ti thei hle a, chu bakah chuan bawng pa khalhin buh chinna tur lei ka let tawh ṭhin bawk," tiin a sawi.

Mi zawng zawng tan hringnun hi a awlsam vek lo a, seilenna hmun a inân loh ang bawkin khawvel hmachhawn chhoh dan pawh a thuhmun thei lo. Amaherawhchu, siamtu hian mitin mai hi ṭhat bikna nei vekin min siam a, midang laka danglam veka siam kan ni. Mihringte 'talent' min pek ṭheuh hi a ti pung thiam chu an ding chhuak ṭhin.

Das-i pawh hian infiamna kawng zawh turin talent a dawng a, naupangte a nih lai aṭangin lehkha zir ai mahin ṭhiante nena infiam chu nuam a tih ber a ni. A tirah a kawng tur hmu nghal mai lo mah se amaha theihna awm chu thup theih a ni lo.

Nun inlet

Hmeichhe naupang kawlhrawng tak a ni a, school an khalna hmunah a kum rualpui mipa naupang hoin football an khelhnaah pawh Das hi a tel fo–a ti kimtu a ni satliah ngai bik lo. An khuaa hmeichhe team an dinah a tel a, striker niin goal khung pawh a thei hle.

A inkhel lai hmutu Physical Education trainer Shamsul Haque chuan Das-i tlan chak zia a hmuh hmaih lo a, ball pet ai chuan intlansiak huanga zuang lut turin a duh, thurawn pein athletics huangah a seng lut–intlansiak tenaua hming a chher hnuin Nagaon Sports Association hmelhriat a ni ta a, inter district competition a hmachhawnah gold medal pahnih a hlawh chhuak.

Football khelh a thiam a, an team-ah player langsar a ni phak. Mahse, footballer lansarh lohna rama cheng a nih zia a hai lo, a bikin hmeichhe tan kawng a thui lo niin a ngai. Das chuan, "Striker ka ni a, goal khung nuam ka tiin ka pet goal hnem thei hle. Mahse, hmeichhe football a la hnufual em avangin kal zel theih niin ka ngai lo," a ti.

A bul ṭanna

A theihna a sang a, a theihna lan chhuahtir turin a taksa a sawizawi nasa bawk. 2018 Commonwealth Games-ah khan India tan feh chhuakin 400m leh 4x400 relay-ah a in lan a, 400m bikah final thlengin second 51.32 chhungin a thleng a, parukna a ni–pakhatna Amantle Montsho chu second 1.17 in a phak lo.

World U-20 Championships 2018-ah erawh a ṭhatna upbeh theih a ni tawh lo a, ropui takin hnehna a chang. A coach Nipon Das chuan tuna hlawhtlinna a chang chu a bul ṭanna chauh a nih thu a sawi a, dinhmun sang leh zual zawk a tawn theih ngei a ring bawk.

Nipon chuan, "Hima hi a thawkrim em em a, a rilru puthmang a dikin a huaisen bawk. Mitin mai hi a kawm ngeihin thil a man thiam a, tlan kawnga a luh tawh chuan amah tibuai thei thil dang a awm tawh ngai lo. A naupan lai khan mipa kiangah a infiam ṭhin a, kha khan inrintawkna a siamin tumruhna a pe bawk.

"100m leh 200m-ah pawh a tlan ṭha em em a, chutihrualin 400m-ah a ṭha zawk dawna kan hriat avangin chumi tur chuan zirtirna kan pe a, tun dinhmun hi a thleng thei. Amah hi ka hrechiang a, hmabak tam tak sawi rem lo mah se Asian Games-ah chuan hnehna a chan zui theih ngei ka ring," tiin August 18 aṭanga neih tur Asian Games a thlir nghal.