World Cup hlawhtlinna VAR?
Kum 2018 World Cup-ah football inelna lian bera a vawi khat nan video assistant referee (VAR) hman a ni a, FIFA president Gianni Infantino chuan VAR hlawhtlinna avanga a lawm thu a sawi.
Infantino chuan, "World Cup neih tawh zawng zawnga a ṭha ber neih kan duh thu kan sawi a, kan beisei ang ngeiin engkim a kal a ni. He hlawhtlinna nei tura kan referee-te thawhrimna a ropui hle," a ti.
FIFA deputy secretary general (Football), Zvonimir Boban chuan, "FIFA President-in a sawi angin VAR hi football thlak danglam tura tih a ni lo a, football thian thianghlim tura tih a ni thung. VAR team hnathawh a ropui a, hnathawk zinga ka tel ve thei hi ka lawm a ni," tiin a sawi.
99.3%
FIFA chuan VAR hman chuan ṭhat famkim a hnaih thu sawiin inkhel thlak danglamtu thutlukna siamah 99.3% a dik thu an sawi a, FIFA referee committee hotupa Pierluigi Collina chuan, "Ṭha famkim tih theih deuh thaw a ni a, VAR awm lo se chu referee thutlukna dik zawng hi 95% vel bak a ni lo ang," a ti.
Italian referee legend Collina-a'n 99.3% a dik thu a sawi rualin zawhna piang nghal chu 0.7% thutlukna dik lo chungchang a ni a, FIFA head of refereeing Massimo Busacca chuan, "Pathian ang ni turin min beisei a nih hi. Ṭhat famkim tawp chu a theih loh," tiin a sawi.
Russia-ah khan VAR hmanga ennawn a nih hnuah penalty chu vawi sarih ngawt pek a ni a, goal hnih chu linesman-ten offside an phar hnuah VAR hmanga ennawn niin goal-ah pawm a ni a, heng zingah hian South Korea-in Germany pet thla tura an goal khung chu a tel.
Vawi 455
World Cup-ah match 64 khelh a ni a, VAR team-in thil thleng an endik zat chu 455 niin match tinah vawi 7.1 endik nei zel ang an ni. Vawi 455 an endik tih hian khelmuala awm referee chu an va hrilh vek tihna a ni hran lo a, an va hrilh a nih pawhin referee-in endik ṭul ti loin a lo hnar ve thei bawk.
VAR team hian thutlukna dik lo awm palh thei laka inven nan thil thleng 455 chu video assistant referee room lamah an lo endik tihna a ni a, referee hrilh hriat ngaia an hriat chuan inbiakpawhna tur pek an nih hmangin khelmuala awm referee chu an be ṭhin.
Vawi 455 ennawnah hian referee-ten VAR an hman tak erawh vawi 20 chauh a ni a, thil thleng an ennawn zat ngaihtuah chuan referee-in VAR an rawnna hi a tam lo hle.