Mercedes-ah Hamilton a nghet
Formula 1 driver champion lai Lewis Hamilton chuan Mercedes tan a rinawm zia lantir nan contract thar a ziak a, kum 2020 thleng chu Mercedes car a khalh chhunzawm dawn tihna a ni.
Kum 33 mi Hamilton hian a contract neih laiah chuan season khat chhungin pound maktaduai 30 a hlawh dawn a, a hlawh hi pound maktaduai 40 thlenga pung chho thei tur a ni bawk - a bonus dawn dan a zirin a danglam thei dawn.
World champion vawi li ni tawh Hamilton hi season kal laiah pahnihna a ni mek a, inelna zatve chauh an la zawh avangin nomawi humhim turin beiseina a la nei. British driver hian contract thar chungchang hi nikum thlasik lai khan Mercedes F1 boss Toto Wolff nen an sawidun tawh thu a sawi.
Hamilton chuan, "Mercedes chhungkuaah hian kum 20 chhung ka awm tawh a, tun ang renga hlim hi ka la nei ngai lo. Hmasawn tumin hma lakna a awm reng a, tun season aia
ṭha hian season tharah chuan kan inlan theih ngei ka beisei," tiin hma an sawn zel a rin thu a sawi.