Mourinho-a'n Pogba beisei sang

Manchester United manager Jose Mourinho chuan France tana World Cup nomawi chawitu Paul Pogba chuan a theihna san zia a hriat chhuah a beisei thu a sawi a, season tharah club tan a ṭangkai leh zual ngei a ring bawk.

Man United midfilder hian World Cup final-a Croatia an hneh ṭum khan goal a khung a, an ram hi 4-2 a chakpuiin a vawi hnih nan world champion an ni. Khelmual chhunga a chetla hmu tu ten club aiin ram tan a khel ṭha zawk hle niin an sawi mek.

Juventus aṭanga United-in an lei Pogba hian season hmasa kha a khel chhe lo a, chutihrualin Italian club tana a khelh ang chuan a khel rih lo a, season chawhnu lamah chhawr loh a ni zauh zauh bawk. Champions League last 16-a Sevilla an hneh loh ṭum pawhin vawi hnih ngawt inkhel bul ṭantu zingah telh a ni lo.

Mourinho chuan, "An ramin hnehna an chan theih nana a tha thawh hlawk zia kha a hmuh thiam ka ring, a bik takin tournament an khelh rei hnu khan a khel ṭha zual hle a ni," tiin a sawi. United defender hlui Rio Ferdinand chuan club tana Pogba khelh dan chungchangah Mourinho chu mawhphurtu lian a nih thu a lo sawi ve tawh thung.

Manchester United hi season thar inbuatsaih nan United States lamah an thang mek a, midfielder Pogba erawh chawlh pek a la ni. Goalkeeper David de Gea, midfielder Nemanja Matic leh player lei thar Fred te erawhin karlehah club training an zawm hman tura ngaih a ni thung.

Chelsea manager hlui Mourinho chuan, "Player dang laka ka tih ang bawkin Paul kha message ka thawn, mahse ani chuan final a khelh avangin thu dang deuh ka thawn thung," tiin World Cup khela chhuak a player-te duhsakna thu a thawn vek thu a sawi.

World Cup khel lo mah se Alexis Sanchez-a'n a tir aṭangin club training a zawm thei lo a, Arsenal forward hlui hian visa buaina avangin US a lut ve nghal mai thei lo a ni.

Mourinho chuan, "A nihna takah chuan Alexis kha a lungngai hle, ama tan bakah kei leh team tan thil ṭha a ni lo. Mahse, he thuah hian tumah dem tur an awm lo, thuneitu lam thutlukna kha ka zah sak tur a ni," tiin a sawi.