Bayern-in Barca an pet chhuak

European champion vawi nga zet ni tawh FC Barcelona chu Bayern Munich-in an mualah 3-0 in an sawp a, kum 17 hnua a vawi khat nan Champions League group stage an paltlang zo lo.

Allianz Arena-ah Thomas Muller, Leroy Sane leh Jamal Musiala ten goal khat ṭheuh an khung a, Bayern hi an phu angin 3-0 in an chak. Group E inkhel dangah Benfica-in Dynamo Kiev 2-0 a hnehin German club puihna zarah last 16 an lut ve bawk.

Xavi enkawl Barcelona erawhin Europa League an khelh chhunzawm a ṭul dawn a, Lionel Messi chhuahsan Catalan club hi tun dinhmunah chuan Europe-a inelna sang ber khel zel tlak an ni lo.

Boruak a ṭang
Bayern hi inkhelh hmain hmahruaitu nichungin last 16 lut chiang tawh mah se Barcelona lakah chak ngei an duh. Inkhelh hmain Bayern chhul chhuak Thomas Muller chuan uar takin chak ngei an tum thu a sawi a, a chhan bulpui ber chu Robert Lewandowski aia Lionel Messi-a'n Ballon d'Or a dawn vangah a ngaih theih.

Bavarian manager Julian Nagelsmann pawhin player thlan theih zinga ṭha ber a thlanchhuah tur thu a sawi a, Benfica tan chanchin hriat nuam a tling. German manager hian a sawi ang ngeiin player ṭha a luhtir a, chutihrualin midfielder pawimawh pahnih Joshua Kimmich leh Leon Goretzka te a chhawr thei lo.

An inthlau
Bayern-in tun hnaiah Barcelona an ngam hle. German champion hian kum 2020 khan UCL quarterfinal-ah Lionel Messi leh Luis Suarez telna hi 8-2 in an sawp tawh a, tun season-ah 3-0 ve vein an hneh leh bawk.

Barcelona manager Xavi-a'n inkhel thunun a duh thu sawi mah se ṭan phat aṭangin Bayern an chungnung. Covid-19 vanga entu an awm lo chungin mualneitu an phur a, chak duhna an ngah.

Catalan club-in Ousmane Dembele hmangin chance ṭha nei hmasa mah se Muller leh Lewandowski ten an rum ṭhaih. Minute 34-naah goal an hlawh chhuak a, Lewy thawhrah sengin Muller-a'n vannei takin a tauh goal. Minute 43-naah kawh zetin Sane-a'n box pawn aṭangin a pet goal a, keeper Andre Ter-Stegen a ti ṭha tawk lo.

Second half ṭan chiahah Sane-a'n goal ruakah a khung lo a, Bayern-in inkhel an thunun miau avangin minute 62-naah Musiala-a'n Alphonso Davies a siamsak a khung. Barca-in Bayern tlarhnung an ti buai lo a, Sane-a'n hun tawp hma hretin chance ṭha a hlah leh bawk.

Eng nge an sawi?
Bayern Munich-in group stage-ah point 18 an hmu a, Liverpool leh Ajax te nen chak vekin last 16 an lut. Inkhelh banah Nagelsmann chuan, "Kan khel ṭha hle. Club lian tak kan hmachhawn a, chak an mamawh bawk. Chutichung chuan nuamsa takin hnehna kan chang. Chutihrualin kha aia khan han ṭang leh deuh ila, goal thum aia tam kan khung thei ang," tiin a sawi.

Barcelona coach Xavi Hernandez chuan, "Keini aiin kan ṭha zawk a, an chungnung zawk a ni. Theihtawp kan chhuah a, kan thiam ang tawkin nawr mah ila hun rei lote chhungin a chungnung zawk an ni zel," tiin an tluk lo tih a pawm.