European champion Chelsea an chak zo lo
Champions League nomawi kawltu Chelsea-in group stage-a an match hnuhnung berah hnehna an chang zo lo a, khualmualah Zenit St Petersburg nen 3-3 in an inhnehtawk.
Blues tana lawmna tur erawh an striker pahnihin goal an khung chu a ni a, Timo Werner chuan goal hnih khungin Romelu Lukaku chuan goal khat a khung ve bawk.
Chelsea an chak zawh loh laiin Juventus chuan Moise Kean-a goal hmangin 1-0 in Malmo an hneh thung a, Italian club hian hnehna an chan avangin group hmahruaitu ni chungin last 16 an lut.
Thomas Tuchel-a enkawl Chelsea-in hnehna an chan zawh loh avangin knockout round-ah team ṭha an tum dawn tihna a ni a, London club tan hian Zenit hneh loh hi a la pawi chauh thei.
Bul ṭan ṭha
Chelsea-in goal khung turin hun an mamawh rei lo a, Werner chuan minute hnihna lekah goal khung dan a la theihnghilh lo tih pholangin goal a rawn khung nghal - Zenit an inring hman lo.
Mahse, Russian club-in mahni muala tlawm an duh lo. Claudinho leh Sardar Azmoun ten minute 38 leh 41-naah goal an rawn khung a, chawlhlawk hman a nih hmain mualneitu team hi hma an rawn hruaipui fel der.
Chelsea-in team huaisen zia an chhuah a, an khelh ṭhat loh zanah pawh chak an duh - minute 62-naah khel ṭha lo Lukaku chuan a khelh ṭhat loh thup nan goal a khung a, 3-2 a ni.
London club hi an chak tawh mai dawn niin a lang hman a, mahse, Zenit an lo la beidawng lo - Russian club hian last 16 lut thei tawh lo mah se mualpho an duh lo a, hun pek belh minute linaah Magomed Ozdoev chuan si phurh a rawn sut a, an in draw.
Siamṭhat ngai Chelsea
December-ah Premier League club tan fixture a hautak ṭhin a, Tuchel pawhin hei hi chhuanlamah siamin player pariat ngawt a siksawi - hemi piahlamah hian hliam vangin Ben Chilwell, Jorginho, Mateo Kovacic leh N'Golo Kanté te a chhawr thei lo.
German coach hian player-te hi dam kim pawh ni se a inkhel pawimawh dan thlirin a chawlhtir tho a rinawm thung a, hei vang hian Nilaini zana a squad aṭang pawhin Zenit hneh tur khawp chu player a nei.
Mahse, October hnua a vawi khat nana inkhel bul ṭan Lukaku a la hriam tawk lo a, Mason Mount, Werner leh Saul ten uiawm takin an chance neih ṭhat chu an hlah bawk - Blues hian insiamṭhat an mamawh.
Chelsea tan keeper Kepa Arrizabalaga-a'n Azmoun chu vawi hnih ngawt amah chauha a hmachhawn chungin a dang ve ve a, Kepa chet ṭhat zan ni lo se Chelsea hi an mualpho hial ang. Blues hi West Ham hneh lo hlim an ni tih hriat tel a ṭha.
Juve an chak
Chelsea chak zawh loh zanah Juventus-in hawihhawm an chhuah duh lo a, an mikhual inthlahrung Malmo lakah 1-0 a hnehna changin group hmahruaitu an ni - Swedish club erawh table mawngphah luah chungin Champions League an mangṭha.
Juve tan Everton duh loh Kean chuan minute 18-na lekah goal hmahruai a khung a, mual ding lam aṭanga Federico Bernardeschi-a siamsak hi assist ṭha bik a tling.
Kum 21 leh ni 283 mi Moise Kean hi Juve tana Champions League-a goal khung thei naupang palina a ni a, amah aia kum nau chungin Alessandro Del Piero, Dejan Kulusevski leh Paul Pogba te chuan Juve tan European football-a club inelna sang berah hian goal an lo khung tawh.
Juve hi an vanneih zan ni se, Daniele Rugani, Kean, Adrien Rabiot leh Bernardeschi te chu goal khung belh thei an ni - AC Milan striker hlui Jon Dahl Tomasson enkawl Malmo tla mah se kartir khan Swedish league-ah an champion a, season thara Champions League first qualifying round khel turin an tling der.
Minute 15 hma lam chhung chu ṭha takin kan khel a, a hnuah erawh kan khelh dan kan theihnghilh a, team ṭha zawk kan nih chhan kha kan theihnghilh zui a ni. Goal kan khung khan kan mizia a danglam nghal a, khatiang kha kan tih ngai loh thil a ni a, tih miah loh tur a ni bawk. Level sang taka tih reng kan duh kha kan ti a, chutiang tur chuan hrehawm pawh kan huam tur a ni. Kan lo na deuh a nih pawhin theihtawp chhuah zel ila, inkhelah chiah rilru pe ila, harsatna chu kan paltlang thei ang. Goal khung vanga kan rilru puthmang kan thlak chuan hrem kan huam tihna a ni a, thil dang a ni lo. A pawimawh ber chu hma kan hruai laia hmasawn zel tum kha a ni. - Thomas Tuchel, Chelsea manager