Real Madrid an chak nuamsa

Spanish La Liga ṭan hnua an match hmasa berah Real Madrid chuan Pathianni zan khan Eibar an mikhual a, harsatna nei loin 3-1 in an hneh. 

Zinedine Zidane-a'n a vawi 200 nana Real a kaihhruaina inkhelah hian Toni Kroos chuan goal hmahruai a khung a, Sergio Ramos leh Marcelo-ten goal khat ve ve an khung bawk. 

Eibar tan Pedro Bigas chuan second half-ah goal khung ve mah se comeback tur khawpin an theihnain a tlin lo a, Real hmaah dawl zawrin an zawr. 

Real-in hnehna an chan ve leh tak avangin Barcelona an thlauhna chu point hnih lek a nih chhunzawm lehnghal a, Spanish La Liga-a champion tura inum boruak a ngaihnawm zel dawn. 

Santiago Bernabeu sak ṭhat mek a nih avangin Real hian an khelmual ngai an hmang thei lo a, reserve team-in home ground atana an hman Estadio Alfredo di Stefano-ah an inkhel. 

Stadium hi mi 6,000 lek lenna ni mah se a pianhmang erawh Bernabeu ang tho a ni a, training-na atana hmang ṭhintu Real an talbuai phah lo - minute lina lekah Kroos chuan goal hmahruai a khung. 

German midfielder goal khung hi goal 'class' bik a ni a, player thiam bik lo tan chuan Kroos-a pet anga pet goal hi a harsa ang! Minute 30-naah Sergio Ramos a lo lang ve leh a, defender goal khung thei hian an goal hnihna a khung. 

Ramos hian season hmasa khan inelna hrang hranga match 42-a khelhah goal 11 a khung a, tun season-ah match 35 khelin goal riat a khung tling leh der tawh bawk - European football-a striker vantlang hoin season khata goal an khung zat zet chu a khung ta!

Real Madrid tan Brazilian defender Marcelo chuan minute 37-naah an goal thumna a khung a, a khung zawh rual hian a goal khung lawm nan a ṭhingṭhi zui. 

Tun hnaiah Black Lives Matter movement-in khawvel a nghawr nghing a, mi hang hmuhsitna duh loin khawvel mi lar tak takin an aw an chhuah mek. 

Marcelo pawhin vun rawng inthliarna a duh lohzia lantir nan a ṭhingṭhi a, 'Black Lives Matter movement' thlawpna lantirna hi infiamna khawvelah kan la hmu chho dawn chauh niin a lang. 

Eibar tan hian Real Madrid player hlui Pedro Leon-a shot chu Bigas chuan dang perin goal-ah a lut a, Real chhaih mangang turin goal dang erawh an khung thei tawh lo - hun a tawp a, 3-1 in Los Blancos an chak. 

Real tan beisei anga season bul a ṭan loh avanga sawisel hlawh Eden Hazard a inlan a, Belgian forward hi hliam vangin rei tak chawl mah se a thiam a la theihnghilh lo. 

March-a a ke rek hliam vanga zai tawk forward hi Kroos-a'n goal hmahruai a khung theih nana player thawh hlawk a ni a, Eibar midfielder a ṭhiah zarah Kroos chuan hun ṭha neiin goal hmahruai a khung. 

Ramos-a goal khung pawh hi Hazard-a siamsak a ni - kum 29 mi forward hian goal khung theihna remchang nei mah se Ramos tan awlsam taka khung turin a pe a, Spanish defender tan harsatna a awm lo. 

Real goal thumna a luh theih nana tha thawhtu pawh Hazard bawk a ni a, a shot per lehlam chu Marcelo-a'n lo chang fuhin goal khungtu zingah a hming a chhu kai. 

Second half ṭantir lamah Eden Hazard leh Sergio Ramos chu lakchhuah an ni a, TV lam aṭanga inkhel lo entu Real fan-te tan thil hmuh nuam a ni lo - player pahnih hi an inhliam niin a lang. 

Hazard hian November leh February khan a ke rek ding lamah hliam a tuar a, March khan a hliam hi zai a ni. Bench-a a ṭhutin a ke rek ding lam hi vurin a dep zui a, fans an hlauthawng.

Mahse, Real boss Zidane chuan, "Eden tan match pumpui khelh theih a la ni lo a, a tan a harsa rih a ni. Darkar khat a khelh chhung khan a khel ṭha takzet a, hliam a nei nia kan hriat kha chuan kan hlauthawng hman hle. 

"Mahse, chawlhlawk lai khan a ṭhat thu min hrilh a, a khelh dan hian minti lawm takzet a ni," a ti a, Hazard chu invenna avanga la chhuak an nih thu a sawi. 

Real Madrid-in 3-1 a Eibar an hnehna inkhel hi coach Zinedine Zidane-a tan Real enkawl chunga match 200 a hmachhawnna chiah a ni a, manager nghet neih harsat ve tak Real team, inelna hrang hranga match 200 kaihruai thei coach pathumna a ni. 

Madrid khaw club hi Miguel Munoz (605) leh Vicente del Bosque (246)-te chuan match 200 an lo kaihruai tawh ṭhin a, Del Bosque bik hi chu Zidane hian a la khum mai theih a rinawm. 

Kum 47 mi coach hian Real B team a enkawl reng hnuah January 2016 khan senior team manager nihna chanvo a chelh ṭan a, May 2018 thleng a cham hnuah a chhuahsan - mahse, khelmuala talbuai Real-in March 2019 khan an ko kir leh a, match 200 lai a kaihruai tling ta. 

Zidane hian match 200-a enkawl chhungin Real tan Champions League (3), La Liga (1), FIFA Club World Cup (2), UEFA Super Cup (2) leh Spanish Super Cup (2) nomawi a chawi hman a, a hlawhtling hle.