Formula 1 boruak a sang takzet
Buai nuaih nuaihna, chetsualna leh thu inchuh tam tak a awm - Formula 1 season hman lai hian thawnthu ngaihnawm a rawn ken tel a tam hle. A ti ngaihnawmtu chu Lewis Hamilton leh Max Verstappen te an ni.
Intlansiak vawi 21 an neih tawh chinah driver pahnih hian point 369.5 ve ve an hmu, an in um tawk takzet. Pathianni zanah Abu Dhabi Grand Prix an tlan leh dawn, kumina intlansiak hnuhnung ber tur a nih avangin engkim chinfelna tur a ni nghal.
Red Bull an harh
Tun hnai season sarih chhung zet chu Mercedes-in Formula 1 an thunun a, hetih chhung hian Hamilton-a'n nomawi vawi ruk a chawi a, a teammate Nico Rosberg chu vawi khat a champion ve bawk - team dang tan hmun remchang an siamsak eih lo.
Sebastian Vettel awm laiin Red Bull hian 2010 aṭanga 2013 chhung khan car intlansiakna sang ber hi an thunun ve bawk a, a hnu lamah chuan team ṭha tak ni mah se an la champion leh thei chiah lo, uiawm tawk velin season an khar ṭhin.
Kuminah erawh Red Bull hian season inbuatsaih lai aṭangin car an nei ṭha tawk tih an lantir a, intlansiak pangngai an neihah pawh a vawi hnihnaah hnehna an chang nghal, roreltu ang maia awm Mercedes tan elpui tlak an ni tih an nemnghet.
Team championship lamah Mercedes hian point 587.5 hmuin hma an hruai mek a, an hnuai chiaha awm Red Bull-in point 559.5 an hmu thung; season danga fal taka Mercedes kal ṭhin chu tih khawtlai an ni.
Buaina ṭhenkhat
Team lamin car ṭha ber neih an tum ṭheuh a, an intlansiakna tur hmun a zirin an motor ke (tyre) hman tur pawh an thlang uluk thei hle. Ruah sur vanga kawng a huh leh, ni sa vanga tlankawng a ro viau chuan an tyre hman pawh a danglam ṭhin.
Azerbaijan GP an tlan laiin kawng ngilah Verstappen chu 200mph a chakin a tlan mek a, vanduai thlak takin a car ke hnung lam chhiain a tlan zui thei tawh lo. Chetsualna thleng avangin Red Flag an zar a, intlansiak pawh an tlan ṭhat a ngai hial.
Max-a ang bawkin Hamilton pawh a che fuh bik vak lo. Britain tlangval hi 15-naah a thleng hram a, point hmu loin inelna a khar - June thla a thil thleng hi driver pahnih an chet fuh loh rualna hmasa a ni.
Silverstone tlankawngah
Red Bulll an kaltluang a, beisei angin Mercedes an che fuh lo. Mercedes boruak hniam lai deuhin Silverstone tlan kawngah British Grand Prix tlan a ni a, tualchhung tlangval Hamilton chu chak tura rinkai ber a ni tlat lo.
Mahse, Hamilton hian 10 second penalty a hmu chungin hnehna a chang tho! A chak dan erawhin sawi zui a hlawh, lap hmasa bera kawngkawi hmasaah driver pahnih hi an in bakkaih a, a lan dan chuan Lewis chu thiam lo zawk a ni.
Red Bull car a chhia a, a khalhtu Max a tan chhunzawm thei ve tawh lo. Red Bull chuan, "Infiammi chet dan tur a ni lo," tih hialin Hamilton chet dan an sawisel, result leh an point hmuh erawh a ngaiin a kaltlang - a hlawkna teltu chu Hamilton leh Mercedes an ni.
An buai zel
Nipui chawlh an hman hma chiahin Hungarian Grand Prix an tlan. Intlansiak tir lamah chhiatna a thleng leh a, driver ṭha pahnih Verstappen leh Hamilton te chu a tuartu zinga mi an ni a, chak tura ngaih an nihna hmunah harsat takin point an hlawh chhuak hram.
Kawng kawia car tam tak an inbakkaihna avang hian car panga ngawt an tlan chhunzawm thei lo. Harsa takin Hamilton-a'n pathumna dinhmun a luah phak hram a, pakhatna ni lo mah se a lawm ber ṭum a ni hial mai thei.
Red Bull driver Max erawh pakuanaah a thleng hram, ani tan pawh point hnih chauh hmuh belh pawh hi lawmna tur a ni ang. Nipui chawlh an hmang zui a, an rilru leh ngaihtuahna erawh a chawl tel ve lo ang tih a chiang.
Boruak a sang
Mercedes team principal Toto Wolff leh Red Bull hotupa Christian Horner te pawn lamah ṭawngkam hmangin an inbei fo a, an elpui team ve ve na takin an insawisel ṭhin. Tlankawng erawh Max leh Hamilton te inbeihna a ni thung.
Italian Grand Prix-ah driver pahnih hian buaina an nei chhunzawm. Kawng kawiah Verstappen-a'n a hma a awm Hamilton tlanpelh a tum a, kawng an kian lo chunga a tlan luih avangin Mercedes car chungah a tlan lawn!
Driver pahnih hi an tlan chhunzawm thei lo a, intlansiak lehpek atan Verstappen hi hremna pek a ni. Lewis chuan, "Ka thi lo kha ka vannei," tiin a sawi hial a, a thu sawi hi a uar hran lo. Driver chunga thir khamin Hamilton hi a chhan hram a ni.
A la tawp lo
Brazil leh Saudi Arabian Grand Prix-ah team pahnih hian neuh neuh an nei zui leh a, season a zawh hma chuan an inkara boruak sang awm ṭhin hi a tawp mai mai dawn lo, season a zo a nih pawhin nakkum lamah an la chhunzawm a rinawm hial.
Hamilton chuan, "Hun rei tak chhung intlansiak ka hmachhawn tawh, tun ang em em a hautak leh harsa hi ka la hmachhawn ngai lo," tiin a sawi hial a, a elpui Max chu a ṭhat bakah pawisak a nei lo tiin a sawisel tawh bawk.
Dutch tlangval Max hian Lewis angin tawnhriat a la nei tam tawk lo. Mahse, a chhung leh pawn lam aṭanga beihna tam viau ṭhin mah se a chiai duh bik lo a, eng ang taka ṭha nge a nih chu Abu Dhabi-ah fiah a ni ang.