Ralf Rangnick-a'n naupang rual a chhawr

Manchester United-in Champions League group match hnuhnung berah Young Boys an mikhual a, 1-1 in an inhnehtawk.

Group-ah pakhatna an ni chiang tawh tih hriain Ralf Rangnick-a'n Crystal Palace an hneh ṭuma player 11 hlawk a thlak.

Nilaini zan inkhelah Man United tan Mason Greenwood-a'n minute kuana lekah goal hmahruai a khung a, Young Boys tan kum 19 mi Fabian Rieder-a'n mawi zetin minute 42-naah si phurh a sut.

Rangnick-a plan
Man United-in tun season Champions League match hmasa berah Young Boys an hneh lo a, Old Trafford-ah phuba lakna remchang nei mah se Ralf Rangnick-a'n hmathlir thui zawk a nei.

German manager Ragnick chuan, "Squad ka siksawi chhan hi chi hnih a awm. Pakhatna chu senior player khelhna hmun chang tam tawk lo leh rawlthar tan khelhna hun ka siamsak a, a dang leh chu player chhawr rim zawkten hahdamna hun leh training an mamawh," tiin Young Boys a dah hniam vanga squad thlak a nih loh thu a sawi.

Swiss club hmachhawn tute hi Dean Henderson; Aaron Wan-Bissaka, Nemanja Matic, Eric Bailly, Luke Shaw; Donny van de Beek, Juan Mata; Jesse Lingard, Amad Diallo, Anthony Elanga leh Mason Greenwood te an ni. Bench aṭangin Teden Mengi, Tom Heaton, Shola Shoretire, Zidane Iqbal leh Charlie Savage te an lut bawk.

A ngaihnawm lai
Club academy chhuak Heaton hian kum 35 mi a nih hnuah Man United first team tana a match hmasa ber a khel a, English keeper tan hun hlu bik a ni.

Kum 18 mi Charlie Savage hi Robbie Savage-a fapa a ni a, a pa hi Premier League midfielder lar zinga mi a nih bakah Man United-in 1992 FA Youth Cup an champion ṭuma mi kha a ni a. Charlie-a'n minute 89-naa Juan Mata a thlak lai hian BT Sport-ah Robbie leh Darren Fletcher ten commentary an nei:

Robbie chuan, "Man United tana rawn lut hi Charlie Savage a ni a, Juan Mata a rawn thlak. Hetiang ṭawngkam hi ka hmang ang tih reng ka ngaihtuah lo. Ka fapa tan ni duhawm a ni a, a thawhrim rah a seng," tiin a fapa chanchin a sawi.

Bench aṭanga lut dang Zidane Iqbal pawh hi British South Asian footballer zinga Manchester United tana khel hmasa ber a ni a, player talent nei ṭha bik a ni. Kum 18 mi Iqbal hi Iraq U23 tan a khel tawh a, international level-ah England, Iraq leh Pakistan tan a khel thei vek.

Mengi leh Shoretire ten Champions League-a an match hmasa ber an khel a, Zidane leh Savage te tan UCL bakah first team tana an match hmasa ber a ni bawk.

Hmathlir chu
Manchester United chuan December 11, Inrinni zan hian Norwich City an tlawh dawn a, Rangnick-a'n relegation zone-a awm team hmachhawn dawn mah se Premier League inkhel a ngai pawimawh tih a lang.

German manager Ragnick chuan, "Champions League khelh zan ni mah se squad-a awm loten chhun lamah training mumal tak an nei thei a. Norwich kan tlawh hmain ṭum hnih dang kan la nei thei dawn," tiin a sawi a, khelh dan phung thar bel turin a player-te a duh.

Young Boys nen hian Man United lakah bul an ṭan ṭha a, hmahruai belh theihna pawh nei mah se an hmang ṭangkai lo. Chutihrualin player naupang rual an nih avangin Swiss club pawhin chance an nei a, draw hi result awm tak a ni.

UCL chhehvel
UEFA Champions League group stage chu vur tlak vangin match khelh zawh theih a ni lo a, group F aṭangin Manchester United hnung zui tur a la chiang lo - Atalanta leh Villarreal ten beisei an la nei ve ve.
Group leader ni chunga last 16 lut team pariatte a hriat tawh a, chungte chu Ajax, Bayern Munich, Juventus, Liverpool, Lille, Manchester City, Manchester United leh Real Madrid te an ni.
Pahnihna nichunga last 16 lutte chu Atlético, Benfica, Chelsea, Inter Milan, Paris Saint-Germain, Salzburg leh Sporting Lisbon te an ni a, Atalanta emaw Villarreal emaw ten an belh leh ang.
UCL Last 16 draw hi December 13, Thawhṭanni tlai dar 4:30-ah neih a ni dawn. Second round-ah group hmahruaitu leh pahnihna an inkhel dawn a, chutihrualin ram khat club an inhmachhawn theih loh bakah group khata awm team an inkhel thei lo tih hriat a ṭha.
Last 16 first leg hi February 2022-ah khelh a ni ang a, second leg hi March 2021-ah khelh a ni ang. March 18, 2022-ah quarterfinal inkhel tur pawh leh tur a ni a, semifinal leh final thlenga an inkhelh dan tur a hriat nghal bawk ang.