Spurs inkhel tur an ṭhulh

Tottenham Hotspur chu nizan khan Europa Conference League-ah Rennes nen inhmachhawn tur ni mah se Covid-19 vangin an inkhel tur hi ṭhulh a ni a, London club hi an player pariat leh staff pangaten Covid-19 an kai a ni.

Spurs chuan Nilaini khan an club first-team training centre pawh an khar thu an sawi a, UEFA nen inbiakna an neih mek thu leh an inkhelh leh hun tur pawh an puan thuai tur thu an sawi - he thu buatsaih lai hian thuchiang erawh a la awm lo.

Hetihlai hian Spurs inkhelhpui tur Rennes erawh an lawm lo a, London club hian match kaltlangpui tur anga an hrilh hnuah an ṭhulh thu an sawi - UEFA danah chuan player 13 an fit chuan inkhel hi kaltlangpui tur a ni.

European football-a thuneitu sang ber UEFA pawhin Spurs dinhmun chu an zirchian tur thu an sawi a, hetihrual hian Pathianni zan Premier League-a Spurs leh Brighton & Hove Albion inkhel tur pawh ngaihtuah ṭhat mek niin an sawi.