Mizoram cricket team vanduai

Bihar an hneh hnua an match hmasa berah Mizoram cricket team an chak lo. Vijay Hazare Trophy (2021-22) khelh laiah Mizoram hian nimin khan Sikkim chu wicket liin an ngam lo a ni.

Mizoram manager Zosangliana'n ṭhumvawrin kawngro a sut nasat tur thu Vanglaini a hrilh lawk a, a sawi ang ngeiin ṭhumvawra vannei zawk Sikkim chuan vawm hmasak an thlang.

Jaipuria Vidhyalaya Ground, Jaipur-ah hian dai (dew) a tla nasa ṭhin a, khelmual a huh avangin a vaw hmasa tan a harsa. Mizoram lam hian over 50 chhungin run 183 bak an siam thei lo a, mi pakua an thi.

Mizoram lamin an run siam humhim ngei an tum. Remruatdika Ralte leh G Lalbiakvela ten wicket hnih ve ve lain beiseina pawh a awm hman.

Mahse, hun pawimawh laiah Sikkim captain Kranthi Kumar a ding nghet tlat a, ball 83 a hmachhawn aṭanga run 63 siamin a team a chakpui.

Mizoram hian December 11, Inrinniah Arunachal Pradesh an hmachhawn leh dawn. Chumi hnuah plate group a an awmpui Meghalaya leh Nagaland te an la hmachhawn leh ang.

Mizoram Fixtures
December 11, Inrinni
Arunachal Pradesh 09:00 AM Mizoram
December 12, Pathianni
Meghalaya 09:00 AM Mizoram
December 14, Thawhlehni
Nagaland 09:00 AM Mizoram