Bengaluru an chak thei lo

Indian club kalphung mumal ber pawla sawi hin Bengaluru-in eng an ang thei lo - ISL match hmasa bera NorthEast United (4-2) an hneh hnuin chak an nei leh tawh lo a, Hyderabad lakah 1-0 in an tlawm leh ta.

Hyderabad tan Bartholomew Ogbeche chuan inkhela goal awmchhun hi minute sarihna lekah a khung a, Bangalore club lamin a chhanletna tur an neih loh avangin an tlawm.

Bengaluru-in match nga an khelh tawhah vawi thum an tlawmna a ni a, vawi khat chaka vawi khat an khingpui an inhnehtawkpui avangin point nga chiah an nei mek - an ropui lo hle.

Hetihlai hian Hyderabad erawh match li an khelh aṭangin point sarih an nei a, tun season-ah vawi khat chiah an la tlawm - season ṭantir chauh la ni mah se champion an mitthla ngam tawh ang.

Hyderabad-in Mizo keeper Lalbiakhlua Jongte leh midfielder Mark Zothanpuia nei mah se squad-ah an tel lo. Bengaluru tan Edmund Lalrindika'n bul a ṭan a, mahse, minute 35-naah lakchhuah a ni.

Zanin ISL-ah inkhel pakhat a awm dawn a, zan dar 7:30-ah Mizo player tamna club pahnih Odisha FC leh NorthEast United an inkhel ang.

Match thum an khelh tawha vawi hnih chak thei Odisha hian defender Lalhrezuala Sailung, Lalruatthara leh Sebastian Thangmuansang, midfielder Isaac Vanmalsawma, Isak Vanlalruatfela leh Paul Ramfangzauva, forward CVL Remtluanga, Daniel Lalhlimpuia leh Jerry Mawihmingthanga an kawl.

Hetihlai hian Aizawl FC boss hlui Khalid Jamil-a enkawl NorthEast United-ah hian defender Joe Zoherliana, midfielder Emanuel Lalchhanchhuaha, R. Laldanmawia, Lalkhawpuimawia, Rochharzela leh William Lalnunfela te an awm.

An match hnuhnung bera 2-1 a FC Goa hnehtu NorthEast United midfielder Emanuel-a hi hliam vangin tun season a inlan erawh a beiseiawm tawh lo.