A thiam 16 zingah Lille; Sevilla mangṭhatu Salzburg
Champions League group stage ngaihnawm ber ang hiala chhal ngam group G pawh chinfel a ni ta a, Lille leh FC Red Bull Salzburg ten last 16 an lut.
Group G-ah club paliten an match tawp ber thlengin knockout round luh beiseina an nei vek a, a tawpah chuan Lille-in 3-1 in khualmualah VfL Wolfsburg an hneh a, Salzburg-in 1-0 in Sevilla an hneh bawk.
Lille-in Wolfsburg khelmualah mikhual tlangnel zia an chhuah a, Burak Yilmaz, Jonathan David leh Angel Gomes ten goal khat ṭheuh an khung a, German club tana Renato Steffen goal khungin awmzia a nei phak lo.
Salzburg-in an mikhual Sevilla lakah Noah Okafor goal hmangin hnehna an chang a, La Liga lama season duhawm tak hmangtu Spanish club hian Champions League an mangṭha a ṭul phah.
Hei le Lille
Season hmasaah rin loh takin Ligue 1-ah Lille an champion a, Paris Saint-Germain rorelna hial titawpin Champions League meuh khel turin an inpetkai - mahse, tun season-ah erawh beisei an phak lo.
Ligue 1 an champion aṭanga thla khat pawh tling loah coach Christophe Galtier chuan a chhuahsan a, coach thar Jocelyn Gourvennec hnuaiah league match 17 khel tawhin 11-na an ni pha ṭawk.
Season hmasa lawka an khum PSG hi point 18-in an phak lo mek a, league lamah chuan ropui lo tak an ni. Mahse, French club-in European football lamah tualchhung inelnaa an tihsual an khuh a, Europe-a a thiam 16 zingah an tel ta.
Wolfsburg khelmualah tlang tura Lille-in an mamawh chu draw result a ni a, mahse, hetah ngawt hian lungawi tum loin chak an tum ngam - striker chhuanvawr Yilmaz chuan minute 10-na lekah goal a khung nghal.
Team huaisen
Lille hian an beisei angin goal dang erawh an khung lawk lo. Mahse, chak an tum miau avangin an nawr zui a, minute 72-naah Jonathan David chuan an goal hnihna a thawk chhuak leh ta nge nge.
French club hian an la duhtawk lo cheu - Angel Gomes chuan minute 78-naah an goal thumna a rawn khung zui ve leh a, hun a tlem tawh avangin chak tur a chiang tawh.
Wolfsburg-in Lille tlarhnung an rum ṭhaih ve thei meuh lo a, hun tawp nan minute khat chiah a awm tawh tihah
Steffen chuan goal khat rawn khung ve bawk mah se a team ben harh nan a tawk zo lo.
Goal dang lut loin hun a tawp a, Lille-in an phu ang ngeiin last 16 an lut a, hmahruaitu an nih avanga team ṭha pumpelhna chance an neih avangin an lawm a zual ang.
Mangṭha Sevilla
Red Bull Arena-a inkhelah Salzburg chuan team ṭha zawka ngaih Sevilla chu 1-0 in an lo hneh a, an club chanchina a vawi khat nan Champions League last 16 khel turin an inpetkai.
Sevilla hian goal khung hmasak zawkna chance nei mah se Munir El Haddadi chuan bar a tauh per a, nipui transfer laia Chelsea nena sawizawm defender Jules Kounde-a'n a tauh goal lohte chu uiawm tak a ni.
Spanish club-in an goal khung theih loh rah an seng vat a, forward ṭhangduang Karim Adeyemi chuan Okafor tan minute 50-naah a siamsak a, Swiss forward hian harsatna nei loin goal-ah a chantir.
Okafor-a goal khung hnuah hian Sevilla midfielder pawimawh Jordan chuan Adeyemi a pawh avangin a yellow card pahnihna a hmu a, minute 64-naah hnawhchhuah a ni - kim loa an khelh zui avangin Spanish club tan comeback ngaihna a awm tawh lo.