Anfield lo inring rawh; i hmangaih Gerrard a lo haw dawn e!

Kum tam a liam ta - chu chu kum 1999 kha tihna a ni. Liverpool rawlthar duhawm Steven Gerrard-a'n Sheffield Wednesday defender ho pal darh a, Liverpool tana a goal hmasa ber a khung kha. Hmanni lawk emaw tih karin kum tam a liam ta.

Istanbul khawpuia a thil mak tihte pawh kha hmanni lawk ang mai a ni a, AC Milan laka 3-0 a an hnufual hnua Reds player-te a fuih phur dante kha mitthlaah hian 'colour' ngatin an la cham reng - a la rei lo asin!

Mahse, khatihlaia nula tlangval ni tawh tan chuan rizai pawhsawih pui tur zawn a hun tawh viau - hmanni lawk emaw i tih kha hmanlai an chang tawh. I awih lo maw? I ngaihsan ṭhin Steven Gerrard ngei kha coach ni chungin Anfield-ah a kir dawn.

Aston Villa coach hian zanin dar 8:30-ah a team-te nen Liverpool an lenchilh dawn a, thi leh thau pawlha, ropuina tam tak hnara a lo thlan zawk ṭhin team lakah point thum hmuh a tum dawn - an lung a leng lo hian ring lo la!

Mangṭha hmangaihna
Kum 17 zet a theihna zawng zawng a lo hlan tawhna Anfield-in zah takin Gerrard an lo lawm ang tih a chiang a, an lung pawh a leng ang. Mahse, zaninah erawh hmangaihna dah kian hun a ni a, lainatna thlauhthlak hun a ni.

Gerrard tan lunglen a hun lo a, champion duh Reds fans tan an legend chungah zahngaihna lantir chi a ni lo - Gerrard hian Villa a enkawl hnuah danglamna tam tak a thlen nghal a, relegate hlau kha top 10 chung lamah a hruai kai tawh.

Kum 41 mi coach hian Villa hi league match li a kaihruai tawh a, vawi thum hnehna chanpuiin vawi khat chiah an la tlawm - Brighton & Hove Albion (2-0), Crystal Palace (2-1) leh Leicester City (2-1) an hneh a, an ngam loh hi Manchester City (2-1) a ni.

Gerrard chuan, "Anfield-a kal a, hnehna chan a, kut ruak loa haw hi ka duh ber chu a ni mai. Kan tun dinhmun hi thlir ila, Liverpool hi keini ang club tan chuan el phak an ni lo. Mahse, kan theihtawp erawh kan chhuah ang," a ti a, tlawm a tum lo.

Gerrard enchhinna
Liverpool fans tam takin tun hi Gerrard 'enchhinna' angah an ngai - Jurgen Klopp thlak turin an duh a, German coach hian Anfield-ah kum 2024 thleng contract nei mah se a cham chhunzawm loh rinna a lian hle.

Ropui taka Liverpool din thar lehtu coach hian August 2020 khan, "Kum khat ka chawl ang a, football ka ngaih leh ngaih loh ka ngaihtuah phawt ang," tiin a contract zawh huna a hun hman dan tur a lo sawi tawh.

Hei vang hian Scottish football-a Celtic lalṭhutthleng nam thlu a, Rangers champion puitu coach hi Reds fans tam takin an coach turin an awt a, zanin an inkhel tur hi 'audition' tiin a sawi theih.

Mahse, Liverpool hi 'form' em em Mohamed Salah, Diogo Jota, Sadio Mane, Jordan Henderson, Virgil van Dijk leh Trent Alexander-Arnold te ho neitu an ni a, kil tinah Villa nen khaikhin chi an ni lo - Gerrard tan a awlsam lo ang.