Zaninah Bayern champion dawn?

Bayern Munich-in zanin dar 12:00 hian Werder Bremen hmachhawn turin Weserstadion an tlawh ang a, hnehna an chang a nih chuan an champion dawn. Bavarians hian German league nomawi vawi 29 an chawi tawh a, Bundesliga ṭan hnuah vawi 28 an champion a, an chungnung fal hle. Hansi Flick-a hote an champion a nih chuan a zawna vawi riat an champion-na tur a ni.

Bayern Munich-in Niko Kovac hnuaiah season an ṭan a, match 10 khelh aṭangin point 18 a hmu a, point 12 lai an hloh. Bavarians hian Kovac hnuaiah German football an thunun thei lo a, club thuneitu ten thlakna an zawng ru reng. Croatian manager thlakna tur la hmu lo mah se November 2-a Eintracht Frankfurt an hmachhawn ṭumin 5-1 zetin an tlawm. 

Bayern-in thutlukna an siam a ṭul a, assistant manager Hansi Flick chu team enkawl lailawk turin an ruat. Kum 55 mi Flick hi Bayern hrechiangtu a ni a, player a nih laiin league-ah ringawt vawi 104 a khelhsak. 

Coaching lamah pawh tawnhriat ṭha a nei a, Germany national team-ah 2006 aṭanga 2014 thleng assistant coach hna chelhin Die Mannschaft vul laiin team enkawltu zingah a tel.

German Football Association-ah sporting director hna a chelh zui a, Bayern-in Niko Kovac an lakluh khan assistant manager hna a chelh. Bavarian hotuten Flick an ring nghal lo a, amaherawhchu Borussia Dortmund leh Fortuna Dusseldorf te 4-0 ve ve in a hneh nghal. 

Champions League-ah lah an hmaa awm Olympiakos (2-0), Red Star Belgrade (6-0) leh Tottenham (3-1) te an sawp a, league lamah Bayer Leverkusen leh Borussia Monchengladbach lakah tlawm zeuh mah se Flick-a hnathawh an hmuh miau avangin December 22 khan season tawp thleng club a enkawl tur thu an tichiang.

German manager-in German player a vulh lian a, German club-in hma an sawn chho zel. February 9-a RB Leipzig nen goal awm loa an inhnehtawk ve zeuh tih loh chu an chak fai vek a, April 2020 a rawn thlen meuh chuan Bayern hruaituten an hmin tawh - kum 2023 thleng daih contract an ziahpui.

Kartawp khan Bayern Munich-in harsa takin Borussia Monchengladbach 2-1 in an hneh a, amaherawhchu hemi ṭum hian Bundesliga top scorer Robert Lewandowski leh assist ngah ber Thomas Muller an tel lo tih hriat ṭha. 

Hansi Flick-a hnuaiah hian Bayern-in match khatah 2.7 points an hmu a, Bavarians hian Pep Guardiola hnuaiah 2013-14 season khan khan match tinah 2.6 points an hmu a, Jupp Heynckes hnuaia an treble champion ṭum khan match tinah 2.7 points an hmu pha. 

Flick-a hian Guardiola leh Heynckes hnuaia Bayern record ṭha tak a khum a, nomawi lian pathum Bundesliga, DFB Pokal leh Champions League-ah an la champion theih vek avangin Bayern vul lai tihin a 

sawi theih. 

Zanin hian Bayern-in Werder Bremen an hneh chuan an champion dawn a, Bundesliga chik lo tan chuan thil ropui vak a ni lo. Amaherawhchu Kovac an ban lai hian Bayern hi league-ah palinaah an awm a, hmahruaitu Gladbach chu point liin an pha lo.

Tunah erawh Bayern hian match 31 aṭangin point 73 an hmu a, Gladbach aiin point 17-in an sang tawh zawk. Flick-a hote hian Werder Bremen lakah point thum an hmu lo a nih pawhin SC Freiburg leh Wolfsburg te an la hmachawn dawn a, pahnihnaa awm mek Borussia Dortmund tan nomawi beisei ngam chi a ni tawh lo ang.