Women One Day Trophy-ah Dingdi an thiam ber

Cricket Association of Mizoram (CAM) hnuaia inelna, CAM Women One Day Trophy 2021 khelh zawh takah Dingdi chuan Ainawn chu wicket kua a hnehin an champion.

Nimin khan Suaka Cricket Ground, Sihhmuiah final khelh niin, ṭhumvawra vannei zawk Ainawn lamin vuak hmasak an thlang. Over 29.3 chhunga run 85 siamin an thi kim.

Dingdi tan target sang tak a ni lem lo, over 23.2 chhung lekin mi pakhat chauh in hloh chungin an target an khum. Dingdi tan hian J Zothansangi'n run 27 a siam a, ani bakah hian run 25 siamtu Julie Malsawmtluangi a che ṭha bawk.

Inelnaah hian team pali an inlan a, group match-ah vawi khat ṭheuh inkhel kualin, chumi hnuah a sang pahnih ten final hi an khel. Dingdi hi group match china hmahruaitu an ni a, champion hi an phu hle.

Mimal chawimawina siam bawk niin, best batter atan Julie Malsawmtluangi (Dingdi) thlan a ni, ani hian innings thum chhungin run 203 a siam. Best bowler atan wicket riat latu PC Vansangzuali (Zamzo) thlan niin, player of the tournament chu Lalrinfeli Pautu (Ainawn) a ni thung. Ani hian run 187 a siam bakah wicket li a la.

Thlirna Tawi
Dingdi (86/1) bt Ainawn (85/10)
Dingdi hian wicket kua in hnehna an chang
Toss: Ainawn lamain vuak hmasak an thlang
Player of the Match: K Lalthafamkimi
   (Dingdi)

Ainawn 85/10 (29.3 Ov)
Lalrinfeli Pautu (26 (46);
Lalmuanpuii Ralte 14* (30);
Thelma 11 (16)
K Lalthafamkimi 4/12 (4);
Hriatbiki Khawlhring 2/15 (7);
Remremi 2/15 (5)

Dingdi 86/1 (23.2 Ov)
J Zothansangi 27* (83);
Julie Malsawmtluangi 25* (18);
Siamsiami 12 (41)
Dindini Hauzel 0/12 (7);
Lalhriatpuii 0/17 (7)